२०८३ असाेज ४, आइतबार
`व्यवसायीका लागि नि: शुल्क कर तथा लेखा व्यवस्थापन तालिम´
श्रीखबर/चितवन । निर्माण सामग्री (हार्डवेयर) व्यवसाय सञ्चालन गर्दै आएका व्यवसायीलाई कर तथा लेखा व्यवस्थापनसम्बन्धी व्यावहारिक ज्ञान प्रदान गर्ने उद्देश्यले चितवनमा निःशुल्क विशेष तालिम आयोजना हुने भएको छ।
निर्माण सामग्री (हार्डवेयर) व्यवसायी संघ, चितवन, जर्मन विकास सहयोग संस्था GIZ-RSRSD तथा उद्योग वाणिज्य संघ, चितवनको सहकार्यमा तालिम आयोजना गर्न लागिएको हो।
असोज ४ गते आइतबार बिहान ९ बजेदेखि १२ बजेसम्म निर्माण सामग्री (हार्डवेयर) व्यवसायी संघ, चितवनको भवनमा सञ्चालन हुने तालिममा व्यवसायी तथा उनीहरूका लेखा हेर्ने कर्मचारीसमेत सहभागी हुन सक्ने आयोजकले जनाएको छ।
तालिममा लेखा व्यवस्थापन तथा लेखा राख्ने तरिका, कर तथा बजेटसम्बन्धी जानकारी, कर छुट तथा सरकारी प्रावधान, लेखा तथा करसम्बन्धी सम्भावित गल्ती र त्यसका समाधान लगायतका विषयमा जानकारी दिइनेछ। सहभागी व्यवसायीका जिज्ञासालाई समेत सम्बन्धित विज्ञमार्फत प्रत्यक्ष सम्बोधन गर्ने व्यवस्था गरिएको छ।
तालिममा वरिष्ठ चार्टर्ड एकाउन्टेन्ट तथा कर विज्ञहरूको सहभागिता रहने आयोजकले जनाएको छ। व्यवसायीलाई आफ्नो व्यवसाय थप व्यवस्थित, पारदर्शी र सुरक्षित बनाउन आवश्यक कर तथा लेखा प्रणालीबारे व्यावहारिक जानकारी दिने उद्देश्यले कार्यक्रम आयोजना गरिएको हो।
आयोजकका अनुसार तालिम पूर्णतः निःशुल्क हुनेछ भने सहभागीका लागि चिया, नास्ता तथा खानाको समेत व्यवस्था गरिएको छ।
निर्माण सामग्री तथा हार्डवेयर व्यवसायसँग सम्बन्धित सम्पूर्ण व्यवसायीलाई आफ्ना अकाउन्ट तथा लेखा हेर्ने कर्मचारीसहित सहभागी हुन आयोजकले आग्रह गरेको छ।
“व्यवसायलाई व्यवस्थित, सुरक्षित र सफल बनाउन यो महत्वपूर्ण अवसरको सदुपयोग गरौँ” भन्ने सन्देशसहित आयोजकले चितवनका सम्पूर्ण निर्माण सामग्री व्यवसायीलाई तालिममा सहभागी हुन आह्वान गरेको छ।
Advertisement
