२०८३ असाेज २, शुक्रबार
बृहत् रक्तदान तथा रक्त स्वयंसेवक उत्प्रेरणा पुरस्कार प्रदान
श्रीखबर/चितवन । संविधान दिवस तथा स्वर्गीय खिमानन्द न्यौपानेको तेस्रो स्मृति दिवसको अवसरमा चितवनमा ‘मानवताका लागि रक्त अभियान’ अन्तर्गत बृहत् रक्तदान कार्यक्रम आयोजना गरिने भएको छ।
समस्त न्यौपाने परिवारको आयोजनामा तथा विभिन्न सामाजिक संघ–संस्थाको सहकार्यमा हुने कार्यक्रम २०८३ असोज ३ गते शनिबार बिहान ७ बजेदेखि चौबीसकोठी, चितवनमा सञ्चालन हुनेछ। रक्तदानमार्फत मानवीय सेवामा योगदान पुर्याउने उद्देश्यले आयोजना गरिएको कार्यक्रममा रक्तदानसँगै ‘रक्त स्वयंसेवक उत्प्रेरणा पुरस्कार’ प्रदान गर्ने कार्यक्रमसमेत राखिएको छ।
नियमित रक्तदान तथा रक्त व्यवस्थापनमा योगदान पुर्याउँदै आएका स्वयंसेवकलाई सम्मान र प्रोत्साहन गर्ने उद्देश्यले पुरस्कार प्रदान गर्न लागिएको आयोजकले जनाएको छ। कार्यक्रममा वर्ल्ड ब्लड डोनर्स अर्गनाइजेसन नेपाल, चितवन र नवलपुर, चितवन मेडिकल कलेज (सीएमसी) ब्लड बैंक लगायतका संस्थाको सहकार्य रहनेछ।
कार्यक्रमको सह–आयोजकका रूपमा जेसीआई माडी, लायन्स क्लब अफ माडी, लायन्स क्लब अफ चितवन ब्लू स्काई, लायन्स क्लब अफ चितवन साकुरा, लायन्स क्लब अफ नारायणी तथा विभिन्न सामाजिक एवं शैक्षिक संस्थाहरू सहभागी हुने जनाइएको छ।
रक्तदान केवल स्वास्थ्य संस्थाको आवश्यकता पूरा गर्ने कार्य मात्र नभई संकटमा रहेका बिरामीको जीवन जोगाउने महत्वपूर्ण मानवीय दायित्वसमेत हो। त्यसैले संविधान दिवसलाई सामाजिक उत्तरदायित्व र मानवीय सेवासँग जोड्दै कार्यक्रम आयोजना गर्न लागिएको हो।
‘मानवताका लागि रक्त अभियान’ ले स्वर्गीय खिमानन्द न्यौपानेको स्मृतिलाई सामाजिक सेवासँग जोड्दै नियमित रक्तदानको संस्कार विकास गर्न तथा रक्त स्वयंसेवकहरूलाई थप उत्प्रेरित गर्न सहयोग पुग्ने अपेक्षा गरिएको छ।
