२०८३ साउन ६,बुधबार
दीक्षा खनाल
श्रीखबर | चितवन,रत्ननगर–१६, पिठुवास्थित भानु मेमोरियल सेकेन्डरी बोर्डिङ स्कुलले विद्यार्थीको स्वास्थ्यलाई प्राथमिकतामा राख्दै विद्यालय परिसरभित्र जङ्क फुड (पत्रु खाना) को प्रयोगमा पूर्ण प्रतिबन्ध लगाएको छ।
विद्यालय प्रशासनले २०८३ साउन ६ गते जारी गरेको सूचनाअनुसार विद्यार्थीको स्वस्थ भविष्य सुनिश्चित गर्ने उद्देश्यले चकलेट, चुइङ्गम, पाउच, अमिलो, चिप्स, चिजबल, कुरकुरे, ललिपप, लेज, रोल, चाउचाउ, लिची जुस, फ्रुटी, कोक, फेन्टा, इनर्जी ड्रिंक, आइसबल, जेम्स, पियो लगायतका अधिकांश प्याकेटबन्द खाद्यवस्तु विद्यालयभित्र ल्याउन र प्रयोग गर्न पूर्ण रूपमा निषेध गरिएको छ।
विद्यालयले अभिभावकलाई आफ्ना बालबालिकाका लागि घरमै तयार गरिएका पौष्टिक तथा स्वच्छ खाजाहरू पठाइदिन आग्रह गरेको छ।
विद्यालयका अनुसार अहिलेको अस्वस्थकर खानपानको बानीले बालबालिकाको शारीरिक तथा मानसिक विकासमा दीर्घकालीन नकारात्मक असर पार्न सक्ने भएकाले यस्तो निर्णय गरिएको हो। विद्यालय प्रशासनले “विद्यार्थीको स्वास्थ्य नै सबैभन्दा ठूलो धन हो” भन्ने मान्यताका साथ सुरु गरिएको यस अभियानलाई सफल बनाउन अभिभावक, शिक्षक तथा सम्पूर्ण सरोकारवालाको सहयोग आवश्यक रहेको जनाएको छ।
शैक्षिक संस्थाले विद्यार्थीमा स्वस्थ जीवनशैलीको विकास गराउने उद्देश्यले जङ्क फुड नियन्त्रण अभियान अघि बढाएको यो पहललाई अभिभावक तथा स्वास्थ्यकर्मीहरूले सकारात्मक रूपमा लिएका छन्।
विद्यालयको यस्तो निर्णयले अन्य शैक्षिक संस्थालाई पनि स्वस्थ विद्यालय वातावरण निर्माणतर्फ प्रेरित गर्ने अपेक्षा गरिएको बताएको छ।
