२०८३ साउन ९, शनिबार

कृष्ण खनाल

श्रीखबर/ प्रदेशहरुमा नयाँ सरकार गठनका लागि नेकपा (एमाले) र नेपाली कम्युनिस्ट पार्टी (नेकपा) बीच लिखित सहमति भएपछि एमालेका संसदीय दलका नेता तथा पूर्व आर्थिक मामिला तथा योजनामन्त्री जेएन थपलिया बागमती प्रदेशको नयाँ मुख्यमन्त्री बन्ने सम्भावना बढेकाे छ।

दुई दलबीच भएको लिखित सहमतिअनुसार बागमती प्रदेश सरकारको नेतृत्व एमालेले गर्ने भएपछि मुख्यमन्त्रीमा एमाले संसदीय दलका नेता जेएन थपलियालाई अघि सारिने प्राय निश्चित भएको हो।

सहमतिपत्रमा एमालेका अध्यक्ष केपी शर्मा ओली र नेपाली कम्युनिस्ट पार्टीका अध्यक्ष पुष्पकमल दाहाल प्रचण्डले हस्ताक्षर गरेका छन्।

सहमतिअनुसार केन्द्र सरकारमा दुवै दलबीच सहकार्य गर्ने, प्रदेश सरकारमा पनि आवश्यक समन्वय र सहकार्यलाई अघि बढाउने तथा साझा नीति र कार्यक्रमका आधारमा सरकार सञ्चालन गर्ने समझदारी गरिएको छ। सहमतिसँगै बागमती प्रदेशको सत्ता समीकरणमा महत्वपूर्ण परिवर्तन आउने भएको छ।

एमालेका प्रभावशाली नेता थपलिया यसअघि बागमती प्रदेशका आर्थिक मामिला तथा योजनामन्त्री (अर्थमन्त्री) का रूपमा कार्यसम्पादन गरिसकेका अनुभवी नेता हुन्। प्रदेशको वित्तीय अनुशासन, विकास योजना र बजेट व्यवस्थापनमा उनको भूमिकालाई सकारात्मक रूपमा हेरिएको छ।

राजनीतिक वृत्तमा थपलियाको नेतृत्वमा बन्ने नयाँ सरकारले प्रदेशमा राजनीतिक स्थायित्व, विकास निर्माण र सुशासनलाई प्राथमिकता दिने अपेक्षा गरिएको छ। यद्यपि सरकार गठन, मुख्यमन्त्री नियुक्ति तथा मन्त्रिपरिषद् विस्तारको औपचारिक प्रक्रिया भने संवैधानिक व्यवस्थाअनुसार अघि बढ्नेछ।

एमाले–नेकपाबीच भएको यो लिखित सहमतिलाई बागमती प्रदेशको नयाँ राजनीतिक समीकरणको महत्वपूर्ण मोडका रूपमा हेरिएको छ।

यसले प्रदेश सरकारको नेतृत्व मात्र होइन, वामपन्थी सहकार्यलाई समेत नयाँ उचाइमा पुर्‍याउने संकेत गरेको राजनीतिक विश्लेषकहरूको भनाइ छ।