२०८३ साउन १०, साेमबार

@ ज्ञानेन्द्र पाेख्रेल, सम्वाददाता पश्चिम नेपाल

बर्दिया जिल्लाको बढैयाताल गाउँपालिका -४ स्थित रामनगरमा थारू समुदायले परम्परागत रूपमा मनाउँदै आएको हरेरी पूजा यस वर्ष पनि श्रद्धा, उत्साह र सामुदायिक सहभागिताका साथ सम्पन्न भएको छ।

रोपाइँ कार्य सम्पन्न भएपछि प्रत्येक वर्ष विधिपूर्वक आयोजना गरिने यस पूजामा गाउँका मूल बडघर, गुरुवा, धर्मगुरु, वैद्य, समाजसेवी, ज्येष्ठ नागरिक, महिला, युवा तथा स्थानीयवासीको उल्लेखनीय सहभागिता रहेको थियो।

थारू समुदायका अगुवाहरूका अनुसार हरेरी पूजा गाउँमा सुख, शान्ति, समृद्धि, पर्याप्त वर्षा, उन्नत खेतीपाती, नागरिकको सुस्वास्थ्य तथा दीर्घायुको कामना गर्दै मनाइने महत्वपूर्ण धार्मिक तथा सांस्कृतिक परम्परा हो।

कृषि संस्कृतिसँग प्रत्यक्ष रूपमा जोडिएको यो परम्पराले थारू समुदायको मौलिक पहिचानलाई पुस्तौंदेखि निरन्तरता दिँदै आएको छ। स्थानीयवासी प्रविण चौधरीले हरेरी पूजा केवल धार्मिक अनुष्ठानमा सीमित नभई गाउँमा आपसी एकता, सद्भाव, सहकार्य र सामाजिक सम्बन्धलाई अझ सुदृढ बनाउने महत्वपूर्ण सांस्कृतिक अवसर भएको बताए।

पूजा सम्पन्न भएपछि सहभागीहरूले सामूहिक रूपमा प्रसाद ग्रहण गरेका थिए। कार्यक्रम गाउँका मूल बडघरको नेतृत्वमा सम्पन्न भएको आयोजक समितिले जनाएको छ।

आयोजक समितिले कार्यक्रम सफल बनाउन सहयोग गर्ने सम्पूर्ण स्थानीयवासी तथा सहभागीप्रति आभार व्यक्त गर्दै यस्ता मौलिक सांस्कृतिक परम्पराको संरक्षणले थारू समुदायको सांस्कृतिक पहिचान जोगाउनुका साथै सामाजिक सद्भाव र एकतालाई थप मजबुत बनाउने विश्वास व्यक्त गरेको छ।