२०८३ साउन ५,मँगलबार

श्रीखबर/काठमाडौं ।  कीर्तिपुरस्थित ट्याङ्लाफाँट क्षेत्रमा गुडिरहेको किया कारमा अचानक आगलागी हुँदा चालकको जलेर मृत्यु भएको छ।

बागमती प्रदेश बा ५ च ३०३८ नम्बरको कारमा आगलागी भएको हो। आगो निभाएपनि चालक सिट बेल्ट बाँधेकै अवस्थामा गाडीभित्र मृत फेला परेका थिए। मृतकको परिचय भने तत्काल सार्वजनिक गरिएको छैन।

घटनापछि स्थानीय बासिन्दा र प्रहरीले फायर एक्स्टिङ्गुइसर (आगो निभाउने उपकरण) को प्रयोग गरी आगो निभाउने प्रयास गरेका थिए। पछि घटनास्थलमा दमकल समेत पुगेको थियो।

आगलागीबाट कार पूर्ण रूपमा क्षतिग्रस्त भएको प्रहरीले जनाएको छ। कारमा आगलागी हुनुको कारण तत्काल खुल्न नसकेको र प्राविधिक तथा अन्य पक्षबाट अनुसन्धान अघि बढाइएको जिल्ला प्रहरी परिसर काठमाडौंले जनाएको छ।