२०८३ असार ३१, बुधबार
ज्ञानेन्द्र पाेख्रेल, पश्चिम नेपाल
श्रीखबर/बर्दिया, असार ३१। असंगठित क्षेत्रमा कार्यरत श्रमिकहरूले न्यूनतम ज्याला, सुरक्षित कार्यस्थल र श्रम अधिकार कार्यान्वयनको अभावप्रति गम्भीर चिन्ता व्यक्त गरेका छन्। घरेलु तथा साना उद्योग कार्यालय बर्दियाको आयोजना तथा कमैया महिला जागरण समाजको समन्वयमा गुलरियामा आयोजित श्रमिक र श्रमिक सञ्जालबीचको अन्तरक्रिया कार्यक्रममा सहभागी श्रमिकहरूले आफ्नो भोगाइ सार्वजनिक गरेका हुन्।
बर्दियाका आठवटै स्थानीय तहबाट सहभागी भएका श्रमिक तथा श्रमिक सञ्जालका प्रतिनिधिहरूले रोजगारदाताले तोकिएको ज्याला नदिने, हाजिरी पुस्तिका नराख्ने, समयमै पारिश्रमिक भुक्तानी नगर्ने, श्रम अधिकारको माग गर्दा कामबाट हटाइदिने, सुरक्षा सामग्री उपलब्ध नगराउने, दुर्घटना बीमाबिनै जोखिमपूर्ण काममा लगाउने तथा महिला र पुरुषबीच असमान ज्याला दिने जस्ता समस्या अझै व्यापक रहेको बताएका थिए। कार्यक्रममा राधाकृष्ण जनसेवा केन्द्रका जितराम चौधरीले श्रम अधिकार, असंगठित क्षेत्रका श्रमिकलाई रोजगारदाताले उपलब्ध गराउनुपर्ने सेवा–सुविधा तथा श्रम ऐनमा भएका व्यवस्थाको कार्यान्वयन अवस्थाबारे स्लाइड प्रस्तुतिमार्फत जानकारी दिएका थिए।
त्यसैगरी, सहायक प्रमुख जिल्ला अधिकारी अशोककुमार भण्डारीले नेपालको संविधान–२०७२ ले सुनिश्चित गरेको श्रमिक अधिकारका विषयमा सहभागीहरूलाई जानकारी गराएका थिए। कार्यक्रमका प्रमुख अतिथि तथा बर्दियाका प्रमुख जिल्ला अधिकारी गोगनबहादुर हमालले जिल्लामा श्रम तथा रोजगार कार्यालय नभएकाले श्रमिकसम्बन्धी काम नेपालगञ्जस्थित श्रम तथा रोजगार कार्यालयमार्फत हुने जानकारी दिँदै, कार्यक्रममा उठाइएका समस्याबारे सम्बन्धित कार्यालयसँग तत्काल समन्वय गरी समाधानका लागि पहल गर्ने प्रतिबद्धता व्यक्त गरे।
उनले श्रमिकहरू पनि आफ्ना अधिकारप्रति सचेत र संगठित हुनुपर्नेमा जोड दिए। अन्तरक्रियामा बाँसगढी नगरपालिकाकी गीता कुमाल, राजापुर नगरपालिकाका विरु थारू, अनिता चौधरी, कृष्णा थारू तथा बढैयाताल गाउँपालिकाकी सुनिता थारूलगायतले आफ्ना समस्या र अनुभव प्रस्तुत गरेका थिए।
कार्यक्रममा राधाकृष्ण जनसेवा केन्द्रका केन्द्रीय अध्यक्ष दिनेश श्रेष्ठ, कमैया महिला जागरण समाजकी केन्द्रीय अध्यक्ष कृष्णी थारू, नागरिक समाज बर्दियाका संयोजक हेमा सुनार, नेपाल पत्रकार महासंघ बर्दियाका अध्यक्ष निर्मल घिमिरेलगायतले श्रमिक अधिकारको प्रभावकारी कार्यान्वयन आवश्यक रहेको धारणा राखेका थिए। घरेलु तथा साना उद्योग कार्यालय बर्दियाका प्रमुख इन्द्रराज खत्रीको अध्यक्षतामा सम्पन्न कार्यक्रममा उद्यम विकास सहजकर्ता खिमा मगरले स्वागत मन्तव्य व्यक्त गरेकी थिइन्।
कार्यक्रममा आठवटै स्थानीय तहका रोजगार संयोजक, सञ्चारकर्मी, सरोकारवाला निकायका प्रतिनिधि तथा महिला–पुरुष श्रमिकहरूको उल्लेखनीय सहभागिता रहेको थियो।
