२०८३ भाद्र १२, शुक्रबार

@ ज्ञानेन्द्र पोख्रेल, बर्दिया

बढैयाताल । बर्दियाको बढैयाताल गाउँपालिका–१ ठूलो डाँफेमा सडक छेउको पानी भरिएको नालीमा डुबेर ६१ वर्षीय पुरुषको मृत्यु भएको छ।मृत्यु हुनेमा बढैयाताल गाउँपालिका–१ ठूलो डाँफे निवासी हर्कबहादुर वली रहेको प्रहरीले जनाएको छ।

प्रहरीका अनुसार शुक्रबार दिउँसो करिब १२ बजेको समयमा घरनजिकै रहेको सडक छेउको नालीमा डुबेको अवस्थामा वली फेला परेका थिए। घरपरिवारका अनुसार वलीले प्रायः मदिरा सेवन गर्ने गरेका थिए र घटनाका समयमा समेत मदिरा सेवन गरेको अवस्थामा रहेको बताइएको छ।

प्रहरीका अनुसार मदिराको नशामा झुक्किएर नालीमा खसेपछि समयमै उद्धार हुन नसक्दा उनको मृत्यु भएको प्रारम्भिक जानकारी प्राप्त भएको छ। घटनाबारे घरपरिवारबाट जानकारी प्राप्त भएपछि प्रहरीले घटनास्थलको प्रारम्भिक अनुसन्धान गरेको जनाएको छ।

मृतक वलीको शव पोस्टमार्टमका लागि जिल्ला अस्पताल गुलरिया, बर्दिया पठाइएको प्रहरीले जानकारी दिएको छ। घटनाबारे थप अनुसन्धान भइरहेको प्रहरीले जनाएको छ।