२०८३ भदौ १३, शनिबार
श्रीखबर/चितवन नेपाल पत्रकार महासंघ चितवन शाखाले समाचार संकलनका क्रममा पत्रकारमाथि अवरोध गर्दै मोबाइल खोसेर फोटो तथा भिडियो मेटाइएको घटनाप्रति गम्भीर ध्यानाकर्षण भएको जनाएको छ।
महासंघ चितवन शाखाले जारी गरेको प्रेस विज्ञप्तिअनुसार भदौ १० गते आएको भोटेकोशी बाढीले सबैलाई त्रसित बनाएको अवस्थामा बाढीबाट भएको जनधनको क्षतिबारे निरन्तर जानकारी दिनु पत्रकारको पेशागत कर्तव्य भएको उल्लेख गरिएको छ।
यसै क्रममा चितवनस्थित नारायणी नदीमा फेला परेका पहिचान हुन नसकेका शव व्यवस्थापनका लागि जलदेवी सामुदायिक वनभित्र बनाइएको संरचनाबारे रिपोर्टिङ गर्न पुगेका पत्रकारलाई समाचार संकलनमा अवरोध गरिएको महासंघले जनाएको छ।
पत्रकार महासँघ चितवनले विज्ञप्ति जारी गर्दै रिपोर्टिङका क्रममा पुगेका नेपाल पत्रकार महासंघ चितवन शाखाका पूर्वअध्यक्ष महासँघका बागमती प्रदेशका महासचिव राधेश्याम खतिवडा तथा पत्रकार सन्तकुमार चौधरीलगायत पत्रकारलाई समाचार संकलनमा अवरोध गर्नुका साथै पत्रकार खतिवडाको मोबाइल नियन्त्रणमा लिएर त्यसमा रहेका फोटो तथा भिडियो मेटाइएको विषयप्रति गम्भीर ध्यानाकर्षण भएकाे जनाएको छ।
उक्त घटनाले पत्रकारको सूचना संकलन गर्ने अधिकार तथा प्रेस स्वतन्त्रतामाथि गम्भीर प्रश्न उठाएको भन्दै महासंघले आपत्ति जनाएको छ।
सार्वजनिक सरोकारका विषयमा नागरिकलाई सुसूचित गर्ने अधिकार सुनिश्चित गर्न सम्बन्धित पक्ष जिम्मेवार बन्नुपर्ने महासंघको माग छ।
महासंघले पत्रकारलाई समाचार संकलनमा सहज वातावरण निर्माण गर्न तथा आगामी दिनमा यस्ता घटना दोहोरिन नदिन सम्बन्धित निकायको गम्भीर ध्यानाकर्षण गराएको छ।
नेपाल पत्रकार महासंघले विगतमा पनि समाचार संकलनका क्रममा पत्रकारमाथि अवरोध तथा सञ्चार सामग्री खोसिएका घटनालाई प्रेस स्वतन्त्रतासँग जोडेर आपत्ति जनाउँदै आएको छ।
Advertisement
