२०८३ भाद्र १७, बुधबार
श्रीखबर/चितवन । नेकपा (एमाले) को पार्टी सदस्यता नवीकरण र अनलाइन अभिलेखीकरणमा भरतपुर महानगरपालिका–४ ले १०० प्रतिशत सफलता हासिल गरेको दाबी गरेको छ।
वडा इन्चार्ज प्रकाश आचार्यका अनुसार २०८२ सालको सदस्यता अभिलेखलाई आधार बनाएर २०८३ का लागि गरिएको नवीकरणमा वडाका सबै सदस्यको सदस्यता नवीकरण सम्पन्न भएको छ।
नवीकरण भएका सबै सदस्यको विवरणसमेत अनलाइन प्रणालीमा शतप्रतिशत प्रविष्ट गरिएको उनले बताए। देशभरका ६ हजार ७ सय ४३ वडामध्ये सदस्यता नवीकरणसँगै अनलाइन इन्ट्रीमा समेत १०० प्रतिशत उपलब्धि हासिल गर्ने भरतपुर–४ पहिलो वडा बनेको आचार्यको दाबी छ।
वडा कमिटीले पार्टीसम्बन्धी अभिलेखलाई कम्प्युटर प्रणालीमा व्यवस्थित गर्नुका साथै वार्षिक कार्ययोजना बनाएर कार्यान्वयन र सदस्यहरूको विवरण नियमित अद्यावधिक गर्ने प्रणाली विकास गरेको वडा अध्यक्ष महेन्द्र पौडेलले बताए। सदस्यता नवीकरण तथा डिजिटल अभिलेखीकरणलाई प्रभावकारी बनाउन वडा इन्चार्ज आचार्यको नेतृत्वमा पूर्व वडा अध्यक्ष एवं जिल्ला सल्लाहकार परिषद्का उपाध्यक्ष हरी आचार्य, जिल्ला कमिटी सदस्यहरू रामचन्द्र ढकाल र शरद पोख्रेल, महानगर कमिटी सदस्य होमनाथ पौडेल जिल्ला स्वास्थ विभाग सदस्य ठाकुरप्रसाद कँडेल,पार्टी वडा कमिटी उपसचिव विश्वप्रसाद देवकाेटा, खुमनाथ गिरीलगायतको सक्रिय भूमिका रहेको बताइएको छ। जिल्ला कार्यालयका तर्फबाट प्राविधिक सहजीकरण जिल्ला कमिटी सदस्य रामबाबु सुवेदीले गरेका थिए।
भरतपुर महानगरपालिकाका २९ वडामध्ये क्षेत्रफलका आधारमा भरतपुर–४ ठूलो वडा हो। यहाँ ३४ वटा टोल विकास संस्था रहेका छन्। एमाले चितवनका जिल्ला इन्चार्ज देवी ज्ञवाली तथा पार्टीका पूर्व सचिव तथा बामपंथी नेता विष्णु घिमिरेसमेतकाे बसाेवास रहेकाे वडा हाे ।
यसअघि भरतपुर–११ को पार्टी अध्यक्ष हुँदा ठूलो संख्यामा पार्टी सदस्यता विस्तार, टोल कमिटी निर्माण तथा सदस्यता कार्डलाई डिजिटल प्रणालीमार्फत वितरण गरेका प्रकाश आचार्यलाई जिल्ला कमिटीले भरतपुर–४ को इन्चार्जको जिम्मेवारी दिएको थियो। जिम्मेवारीपछि संगठन निर्माणसँगै अभिलेख व्यवस्थापन र जनसम्पर्कलाई प्राथमिकता दिइएको पूर्व वडा अध्यक्ष हरी प्रसाद आचार्यले बताए।
वडा नेतृत्वले भने पार्टी संगठनलाई समयअनुकूल र युवामैत्री बनाउनुपर्नेमा पनि जोड दिएको छ। प्रविधिसँगै हुर्किएको नयाँ पुस्ताको भावना, अपेक्षा र सिर्जनशीलतालाई पार्टीका नीति तथा कार्यक्रममा समेट्न सके संगठन थप गतिशील बन्ने उनीहरूको भनाइ छ। युवालाई योजनाबद्ध रूपमा सामाजिक तथा राजनीतिक अभियानमा जोड्दै नेतृत्व विकासको अवसर सिर्जना गर्नुपर्नेमा समेत जोड दिइएको छ।
सदस्यता नवीकरणमा देखिएको उत्साह र संगठनात्मक सक्रियताले आगामी निर्वाचनमा सकारात्मक परिणाम ल्याउने विश्वास एमाले वडा नेतृत्वले व्यक्त गरेको छ।
