२०८३ भाद्र १६, मँगलबार
@ प्रेम प्रसाद कँडेल,चितवन
श्रीखबर/ रसुवा जिल्लाको भोटेकोशी नदीमा आएको विनाशकारी बाढीबाट प्रभावित नागरिकको खोज, उद्धार तथा राहत व्यवस्थापनका लागि भरतपुर महानगरपालिका–४ स्थित प्रगति महिला समूहले १ लाख १ हजार रुपैयाँ सहयोग गरेको छ।
भरतपुर–४ शिव पञ्चायन टोल विकास संस्थाको वडामा पहिलोपटक सूचीकृत प्रगति महिला समूहले उक्त रकम प्रधानमन्त्री दैवी प्रकोप उद्धार कोषमा जम्मा गरेको हो। विपद्को समयमा पीडित नागरिकको साथमा उभिनु सामाजिक संघसंस्थाको मानवीय दायित्व भएकाले सहयोग गरिएको समूहकी अध्यक्ष लक्ष्मी नारायणी कडेलले बताइन्।
अध्यक्ष कडेलले बाढीमा परी ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजन तथा आफन्तप्रति हार्दिक समवेदना व्यक्त गरेकी छन्। साथै उनले बाढीमा परी घाइते भएकाहरूको शीघ्र स्वास्थ्यलाभको कामना गरेकी छन्। कडेल भरतपुर महानगरपालिका–४ को महिला सञ्जालकी उपाध्यक्षसमेत हुन्।
सामाजिक क्षेत्रमा सक्रिय कडेलले विपद्को यस कठिन परिस्थितिमा व्यक्तिगत तथा संस्थागत रूपमा सहयोग र सहकार्य आवश्यक रहेको बताइन्। प्राकृतिक विपद्का कारण ठूलो मानवीय तथा भौतिक क्षति भइरहेका बेला विभिन्न संघसंस्था, नागरिक समाज तथा व्यक्तिहरूले राहत तथा उद्धारका लागि सहयोग गर्ने क्रम बढिरहेको छ।
प्रगति महिला समूहको यो सहयोगले विपद्मा परेका नागरिकको उद्धार तथा राहत व्यवस्थापनमा केही भए पनि योगदान पुग्ने अपेक्षा गरिएको छ।
