२०८३ असार -८, साेमबार
श्रीखबर/ नेकपा (एमाले) का उपाध्यक्ष तथा पूर्वअर्थमन्त्री विष्णु प्रसाद पौडेललाई सम्पत्ति शुद्धीकरण सम्बन्धी अनुसन्धानका क्रममा प्रहरीले पक्राउ गरेको छ।
जिल्ला प्रहरी कार्यालय सुर्खेतको अपराध अनुसन्धान तथा कारबाही शाखाले जारी गरेको पत्रअनुसार सम्पत्ति शुद्धीकरण अनुसन्धान विभाग, पुल्चोक–ललितपुरको अनुरोधमा पौडेललाई नियन्त्रणमा लिइएको हो।
विभागले सम्पत्ति शुद्धीकरण (मनी लाउन्डरिङ) निवारण ऐन, २०६४ को दफा २१ अन्तर्गत अनुसन्धानका लागि पक्राउ पुर्जी जारी गरेको जनाएको छ। प्रहरी स्रोतका अनुसार रुपन्देही जिल्ला बुटवल उपमहानगरपालिका–१ स्थायी ठेगाना भएका तथा हाल ललितपुर महानगरपालिका–२५ स्थित सेँधु आवास आयोजनामा बसोबास गर्दै आएका पौडेल सुर्खेतमा रहेको सूचनाका आधारमा खोजतलास गरिएको थियो। सोही क्रममा आइतबार साँझ करिब ७ः१५ बजे वीरेन्द्रनगर नगरपालिका–३ स्थित शुभ होटलबाट उनलाई पक्राउ गरिएको बताइएको छ। जिल्ला प्रहरी कार्यालय सुर्खेतले आवश्यक कागजातसहित पक्राउ गरिएका पौडेललाई थप अनुसन्धान तथा कानुनी कारबाहीका लागि सम्पत्ति शुद्धीकरण अनुसन्धान विभागको जिम्मा लगाउने प्रक्रिया अघि बढाइएको जनाएको छ।
यस विषयमा सम्पत्ति शुद्धीकरण अनुसन्धान विभाग वा एमालेको तर्फबाट औपचारिक प्रतिक्रिया भने सार्वजनिक भइसकेको छैन। घटनाले राष्ट्रिय राजनीतिक वृत्तमा तरंग सिर्जना गरेको छ भने अनुसन्धानको निष्कर्ष र यसले लिने कानुनी दिशा चासोका साथ हेरिएको छ।
