२०८३ जेठ १४, बिहीबार
श्रीखबर/ नेपालगन्ज ।१३औँ अन्तर्राष्ट्रिय महिनावारी दिवसको अवसरमा नेपालगञ्जमा महिला तथा किशोरीहरूलाई महिनावारी चक्र, स्वच्छता तथा व्यवस्थापनबारे अभिमुखीकरण प्रदान गरिएको छ।
एफकेबी यूकेको सहयोग तथा बास नेपालको आयोजनामा सञ्चालित “नेपालमा बसोबास गर्ने महिला तथा किशोरीहरूको महिनावारी स्वच्छता तथा व्यवस्थापन परियोजना” अन्तर्गत आयोजित कार्यक्रममा ३० जना महिला तथा किशोरीहरूको सहभागिता रहेको थियो।
कार्यक्रममा परियोजना व्यवस्थापक रमिता शाह र शिक्षा पर्सन मिना घर्तिमगरले महिनावारी चक्र, त्यससँग सम्बन्धित स्वास्थ्य सचेतना तथा व्यक्तिगत सरसफाइका विषयमा सहजीकरण गरेका थिए। सहभागीहरूलाई महिनावारीलाई लज्जा वा संकोचको विषय नभई प्राकृतिक जैविक प्रक्रिया भएको बुझाउँदै स्वास्थ्यकर व्यवहार अपनाउन आग्रह गरिएको थियो।
अभिमुखीकरणपछि सहभागीहरूलाई ब्रासलेट बनाउने तालिम समेत प्रदान गरिएको थियो। तालिमपश्चात सहभागीहरूले स्वयं निर्माण गरेका ब्रासलेटहरू एकआपसमा वितरण गरेका थिए। कार्यक्रमको समापनमा बास नेपालका निर्देशक हेमराज भट्ट ले सहभागीहरूलाई ब्रासलेट वितरण गर्दै महिनावारीसम्बन्धी सचेतना अभियानलाई समुदायस्तरसम्म विस्तार गर्न आवश्यक रहेको बताएका थिए।
