२०८१ चैत २२, शुक्रबार
कृय्ण खनाल
भरतपुर। भरतपुर महानगरपालिकाले आर्थिक वर्ष २०८१०८२काे दाेस्राे चाैमासिककाे अवधिमा भएकाे कामकारबाहीका विषयमा सार्वजनिक सुनुवाइ सम्पन्न गरेकाे छ ।
महानगरपालिका परिसरमा शुक्रबार सम्पन्न कार्यक्रममा पछिल्ला दिनमा भरतपुर क्षेत्र भित्र भएगरिएका विकासकाे गतिविधि प्रति वडावासीहरुले प्रसँशा गरेका थिए।
चार महिनाकाे प्रगति प्रतिवेदन प्रस्तुत गर्दै महानगरपालिकाका प्रमुख प्रशासकीय अधिकृत लक्ष्मीप्रसाद पाैडेलले महानगरपालिकाकाे प्रशासकीय भवनदेखि रँगशाला,पुङ्गी खाेला,सिटीहल निर्माणका साथै केरुङ्गा नालाकाे साैन्दर्यकरणसम्मकाे प्रगतिलाई प्रतिवेदनकाे रुपमा पेश गर्नुभएको थियाे ।प्रगति विवरणमा मेशजाली फाउन्डेसन ,सडक विस्तार,फाेहारमैला व्यवस्थापन र उज्यालो भरतपुरका बारेमा उल्लेख गरिएको थियाे ।
सार्वजनिक सुनुवाई कार्यक्रममा नागरिकलाई प्रश्नको उत्तर दिदै प्रमुख रेनु दाहालले भरतपुरमा अल्पकालिन, मध्यकालिन र दीर्घकालिन महत्वका योजनाहरु एक साथ अघि बढाएको उल्लेख गर्नुभयो । प्रमुख दाहालले अबको बाँकी कार्यकालमा धेरै कामहरु अगाडि बढ्ने र भरतपुरवासीलाई सन्तुष्ट बनाउने प्रयासमा महानगर अघि बढ्ने उहाँको भनाई थियो ।
प्रगति प्रतिवेदन पेश गर्दै महानगरपालिकाका प्रमुख प्रशासकीय अधिकृत पौडेलले आर्थिक वर्ष ०८१/०८२ को विनियोजित ६ अर्ब ५६ करोड १ लाख ४३ हजार रहेकोमा रु १ अर्ब ९९ करोड खर्च भएको उल्लेख गर्नुभयो ।
यसैगरी महानगरले आर्थिक वर्ष ०८१/०८२ को लागि रु १ अर्ब ८० करोड राजस्व संकलनको लक्ष्य लिएकोमा रु ७७ करोड १७ लाख ५४ हजार १३७ रुपैयाँ संकलन गरेको छ । जुन लक्ष्यको ४३ प्रतिशत हो ।
सार्वजनिक कार्यक्रम जिल्ला समन्वय समिति चितवनमा प्रमुख नारायणप्रसाद अधिकारीले भरतपुर महानगरपालिकाले जनमूखी काम गरेकाे भन्दै नागरिकलाई थप खुशीपार्ने काममा लाग्न सुझाउनुभएकाे थियाे ।
