२०८२ माघ १०, शनिबार
श्रीखबर/ नवलपुरको गैंडाकोट–२ स्थित नारायणी नदी किनारमा सञ्चालन भएको चौथो ‘गैंडाकोट महोत्सव २०८२’ आर्थिक, सांस्कृतिक र पर्यटन प्रवर्द्धनको दृष्टिले ऐतिहासिक रूपमा सफल भएको आयाेजकले जनाएको छ ।
पुस २५ देखि सञ्चालन भएको महोत्सव शनिबार भव्य रूपमा सम्पन्न हुँदै गर्दा करिब दुई लाख दर्शकले अवलोकन गरेका छन् भने २० करोड रुपैयाँभन्दा बढीको कारोबार भएको आयोजकले जनाएको छ ।
जिल्ला उद्योग वाणिज्य संघ गैंडाकोटका महासचिव तथा महोत्सव सचिवालय संयोजक तेजनारायण पाण्डेका अनुसार महोत्सवले स्थानीय अर्थतन्त्रलाई चलायमान बनाउँदै व्यवसायिक वातावरण सुदृढ गर्न उल्लेखनीय योगदान दिएको छ ।
संघका वरिष्ठ उपाध्यक्ष तथा महोत्सव मूल संयोजक छवि कँडेलले महोत्सवले जिल्लामा उत्पादन भएका कृषि तथा औद्योगिक उत्पादनको प्रवर्द्धन र बजारीकरणमा महत्वपूर्ण भूमिका खेलेको बताए । “स्थानीय उत्पादनलाई उपभोक्तासम्म पुर्याउने प्रभावकारी माध्यम बनेको छ,” उनले भने ।
महोत्सवमा कृषि उत्पादनको निःशुल्क प्रवर्द्धनसहित अटोमोबाइल, रेष्टुराँ, घरायसी तथा उपभोग्य वस्तु गरी करिब २५० स्टल राखिएको संघका अध्यक्ष तथा महोत्सव संरक्षक दीपक सापकोटाले जानकारी दिए । यसले स्थानीय व्यवसायीलाई प्रत्यक्ष लाभ पुग्नुका साथै रोजगारी सिर्जनामा समेत टेवा पुर्याएको उनले बताए ।
सांस्कृतिक पक्षलाई समेत प्राथमिकता दिँदै महोत्सव अवधिभर राष्ट्रिय भजन प्रतियोगिता आयोजना गरिएको थियो, जसले स्थानीय कला, संस्कृति र मौलिक पहिचानको जगेर्ना तथा प्रवर्द्धनमा योगदान दिएको छ ।
महोत्सव समापन समारोहमा गैंडाकोट नगरपालिकाका प्रमुख मदनभक्त अधिकारीले गैंडाकोट महोत्सवले नगर मात्र नभई समग्र जिल्लाको धार्मिक, पर्यटकीय र आर्थिक गतिविधि बढाउन महत्वपूर्ण भूमिका खेलेको उल्लेख गरे । स्थानीयस्तरमा आयोजना हुने यस्ता महोत्सवले उत्पादन, रोजगारी र बजार विस्तारमा दीर्घकालीन प्रभाव पार्ने उनको भनाइ थियो ।
गैंडाकोट महोत्सव २०८२ ले स्थानीय उत्पादन, संस्कृति र अर्थतन्त्रलाई एकैसाथ उचाल्दै सफल आयोजनाको उदाहरण प्रस्तुत गरेको आयोजकको निष्कर्ष छ ।
