२०८३ भाद्र ६,आइतबार
श्रीखबर/काठमाडौं । बाराको जीतपुरसिमरा उपमहानगरपालिका–१ दसधुरीकी तीन वर्षीया बालिका गरिमा चौधरीको जघन्य हत्या प्रकरणमा नेपाल सरकार र पीडित परिवारबीच तीनबुँदे सहमति भएको छ।
गृह मन्त्रालयमा शनिबार साँझदेखि मध्यरातसम्म भएको छलफलपछि सरकार र गरिमाका अभिभावकबीच सहमति जुटेको हो। सहमतिपत्रमा सरकारका तर्फबाट गृहमन्त्री सुधन गुरुङसहित सम्बन्धित मन्त्रालयका मन्त्रीहरू तथा पीडित परिवारका तर्फबाट गरिमाका बुवा मनोजकुमार चौधरी र आमा मीनमती चौधरीले हस्ताक्षर गरेका छन्।
सहमतिको पहिलो बुँदामा जघन्य आपराधिक घटनामा विद्यमान कानुनमा रहेको कसुर तथा सजायको व्यवस्था पुनरावलोकन गरी आवश्यक कानुन तर्जुमा वा संशोधनका लागि सुझावसहितको प्रतिवेदन सात दिनभित्र पेस गर्ने उल्लेख छ। त्यसका लागि कानुन, न्याय तथा संसदीय मामिला मन्त्रालयबाट सात सदस्यीय ‘गरिमा न्याय सङ्कल्प समिति’ गठन गरिने भएको छ।
समितिले जघन्य अपराधमा संलग्नलाई कठोर सजाय सुनिश्चित गर्न विद्यमान कानुनी व्यवस्थामा आवश्यक सुधारका विषयमा अध्ययन गरी सरकारलाई सुझाव दिनेछ।
त्यस्तै, दोस्रो बुँदामा पीडित परिवारको अपेक्षाअनुसार बालिका गरिमा चौधरीको सालिक निर्माणका लागि पूर्वाधार विकास मन्त्रालयले स्थानीय तहसँग समन्वय गरी आवश्यक पहल गर्ने सहमति भएको छ।
तेस्रो बुँदामा गरिमाका अभिभावकले आफ्नो रीतिरिवाज तथा संस्कारअनुसार बालिकाको अन्त्येष्टि कार्य सम्पन्न गर्ने विषयमा सहमति भएको छ। गरिमामाथि भएको जघन्य अपराधपछि दोषीलाई कडा कारबाही गर्नुपर्ने तथा विद्यमान कानुनमा सुधार गर्नुपर्ने माग गर्दै पीडित परिवार र स्थानीयस्तरमा विरोध तथा आन्दोलन हुँदै आएको थियो।
सरकारसँग भएको सहमतिपछि पीडित परिवारले उठाएका माग सम्बोधन गर्ने र न्यायिक प्रक्रिया अघि बढाउने प्रतिबद्धता सरकारले जनाएको छ। सहमति पत्रमा नेपाल सरकारका तर्फबाट गृहमन्त्री सुधन गुरुङ, पूर्वाधार विकासमन्त्री सुनील लम्साल, कानुन, न्याय तथा संसदीय मामिलामन्त्री सोविता गौतम, महिला, बालबालिका, लैङ्गिक तथा यौनिक अल्पसङ्ख्यक तथा सामाजिक सुरक्षामन्त्री सीता बादी र कृषि, वन तथा वातावरणमन्त्री गीता चौधरीले हस्ताक्षर गरेका छन्।
पीडित परिवारका तर्फबाट गरिमाका बुवा मनोजकुमार चौधरी र आमा मीनमती चौधरीले सहमति पत्रमा हस्ताक्षर गरेका छन्। अब सहमतिको कार्यान्वयन र ‘गरिमा न्याय सङ्कल्प समिति’ले दिने प्रतिवेदनले सरकारको प्रतिबद्धता व्यवहारमा कति रूपान्तरण गर्छ भन्ने विषय महत्वपूर्ण बनेको छ।
