२०८३ साउन २, मँगलबार
श्रीखबर/ काठमाडौं — नेकपा (एमाले) बागमती प्रदेश संसदीय दलको बैठकले प्रदेश सांसद किरण थापालाई बागमती प्रदेशको मुख्यमन्त्रीका रूपमा प्रस्ताव गर्ने निर्णय गरेको छ। संसदीय दलका नेता जिएन थपलियाको प्रस्तावमा थापालाई मुख्यमन्त्रीका लागि अघि सार्ने निर्णय गरिएको हो।
बैठकले बागमती प्रदेशमा नयाँ सरकार गठनका लागि संसदमा प्रतिनिधित्व गर्ने सबै राजनीतिक दललाई सरकारमा सहभागी हुन तथा सरकार गठनमा समर्थन गर्न आह्वान गर्ने निर्णयसमेत गरेको छ।
त्यस्तै, प्रदेश प्रमुखबाट सरकार गठनका लागि आह्वान गरिएको भदौ ४ गतेको समयसीमाभित्रै सरकार गठनको दाबी पेश गर्ने निर्णय संसदीय दलको बैठकले गरेको छ।
एमाले संसदीय दलको यो निर्णयसँगै बागमती प्रदेशमा नयाँ सरकार गठनको राजनीतिक प्रक्रिया थप निर्णायक बनेको छ।
अब प्रदेशसभामा प्रतिनिधित्व गर्ने अन्य दलहरूको समर्थन र सहभागिताले प्रस्तावित सरकारको स्वरूप तथा नेतृत्वलाई अन्तिम रूप दिने देखिएको छ।
यो निर्णय बागमती प्रदेशको सत्ता समीकरणमा महत्वपूर्ण राजनीतिक घटनाक्रमका रूपमा देखिएको छ।
