२०८३ जेष्ठ १३, बुधबार

श्रीखबर/चितवनको रत्ननगर–१० स्थित गामबेसी चेपाङ संरक्षण केन्द्र मंगलबार विशेष उत्साह र भावनाले भरिएको थियो। केन्द्रमा आश्रित चेपाङ बालबालिकाहरूको उज्ज्वल भविष्य निर्माणमा समर्पित संस्थाले सँस्थापक अध्यक्ष कै कुलका पहिलो विशेषज्ञ चिकित्सक डा. कृष्णप्रसाद खनाललाई सम्मान तथा अभिनन्दन गर्दै प्रेरणादायी वातावरण सिर्जना गरेको छ।

चेपाङ बालबालिकाका लागि निर्मित आवासीय संरचनाहरूको अवलोकनपछि अतिथिहरू केन्द्रको प्रेक्षालयमा प्रवेश गर्दा त्यहाँ रहेका करिब १६० जना बालबालिकाले एकसाथ “स्वागत… स्वागत छ हाम्रा पाहुनाहरुलाई…” भन्दै गीतमार्फत आत्मीय स्वागत गरेका थिए। त्यसपछि केन्द्रका अध्यक्ष तथा ‘चेपाङ बा’का रूपमा परिचित केपी किरण शर्माले फूलमालासहित डा. खनाललाई स्वागत गर्दै “हाम्रो कुलबाट पहिलो एलोपेथिक विशेषज्ञ डाक्टर बन्न सफल डा. कृष्णप्रसाद खनाललाई हार्दिक अभिनन्दन” व्यक्त गरेपछि कार्यक्रम थप भावुक बनेको थियो।

गोरखा दर्बुङ मूलथलो भई हरि शर्मा खनालकाे कुलमा लक्ष्मण( चेतनाथ) खनाल तथा देवका भट्टराई खनालकाे काेखबाट २०४३ सालमा बर्दियाको मुनालबस्तीमा जन्मिएका डा. खनालले २०७१ सालमा पूर्ण छात्रवृत्तिमा एमबीबीएस उत्तीर्ण गरेका थिए भने २०७९ सालमा प्रसूति तथा स्त्रीरोग विशेषज्ञ (एमडी) उपाधि हासिल गरेका हुन्। हाल उनी बर्दियाको गुलरिया अस्पतालमा स्त्रीरोग विशेषज्ञका रूपमा कार्यरत छन्।

अभिनन्दनपछि मन्तव्य राख्दै डा. खनालले आफ्नै अभिभावक र कुल परिवारबाट प्राप्त सम्मान जीवनकै अविस्मरणीय क्षण भएको बताए। “आज म सम्मानित मात्र भएको छैन, सामाजिक उत्तरदायित्व झन् गहिरो रूपमा महसुस गरेको छु,” उनले भने, “जीवनमा मलाई पनि यी चेपाङ बालबालिकाको सेवामा केही योगदान गर्ने अवसर मिलोस् भन्ने चाहना छ।”

कार्यक्रममा विदेश ( भारत)मा गै अैापचारिक शिक्षा हासिलगर्ने कूलकै पहिलाे पण्डित स्वर्गीय माधवप्रसाद खनालकी धर्मपत्नी सुमित्रा खनाल,विदेश ( अमेरिका)मा स्थायी बसोबास अनुमति प्राप्त गर्ने कुलकै पहिलो व्यक्ति बद्री खनाल, खनाल सेवा समितिका निवर्तमान अध्यक्ष केदार खनाल, वर्तमान अध्यक्ष हरिकृष्ण खनाललगायतको उपस्थिति रहेको थियो

विगत १७ वर्षदेखि चितवन, गोरखा, धादिङ, मकवानपुरलगायत क्षेत्रका विपन्न चेपाङ बालबालिकालाई निःशुल्क आवासीय सुविधा र शिक्षासेवा प्रदान गर्दै आएको गामबेसी चेपाङ संरक्षण केन्द्रले सयौं बालबालिकाको भविष्य निर्माणमा महत्वपूर्ण भूमिका निर्वाह गर्दै आएको छ।

सामाजिक अभियानको केन्द्रमै कुलका पहिलो विशेषज्ञ डाक्टरलाई सम्मान गरिनु शिक्षा, सेवा र सामाजिक उत्तरदायित्वको प्रेरणादायी संगम बनेको सहभागीहरूले बताएका छन्।