२०८३ बैशाख २, बुधबार

श्रीखबर/ काठमाडौं बालेन नेतृत्वको सरकारले मन्त्रीहरूको सम्पत्ति विवरण समयमै सार्वजनिक गर्नु सकारात्मक कदम हो। कानुनले तोकेको दायित्व पूरा गर्नु सुशासनको न्यूनतम आधार हो—र त्यो पूरा भएको देखिन्छ। तर, प्रश्न यतिमै सीमित छैन।

सरकार बनेदेखि नै “इमानदार नेतृत्व”, “नयाँ अनुहार”, “भ्रष्टाचारमुक्त शासन” जस्ता नारा जनतामा व्यापक रूपमा बेचिए। विगतका सत्ताधारीहरूलाई “अर्बौं कुम्ल्याउने” आरोप लगाउँदै आएका यही नयाँ नेतृत्वबाट जनताले फरक अभ्यासको अपेक्षा गर्नु स्वाभाविक हो।

तर जब यिनै मन्त्रीहरूले सार्वजनिक गरेको सम्पत्ति विवरणमा ठूलो परिमाणमा सुन देखिन्छ, तब स्वाभाविक रूपमा प्रश्न उठ्छ—यो सम्पत्ति कहाँबाट आयो? प्रधानमन्त्रीदेखि अन्य मन्त्रीहरूसम्मको सुनको विवरण हेर्दा, यो केवल व्यक्तिगत धनीपनको विषय मात्र रहँदैन, यो पारदर्शितासँग प्रत्यक्ष जोडिन्छ। किनभने सार्वजनिक पदमा बसेका व्यक्तिहरूले देखाएको सम्पत्ति मात्रै होइन, त्यो सम्पत्ति कसरी आर्जन गरियो भन्ने स्रोत पनि खुलाउनुपर्ने नैतिक दायित्व हुन्छ।

समाजसेवाबाट आएका, सामान्य पृष्ठभूमिका प्रतिनिधि भनेर चिनिएका व्यक्तिहरूसँग यति ठूलो परिमाणमा सुन हुनु आफैंमा अपराध होइन। तर, जनताले उठाउने जिज्ञासा पनि अपराध होइन।

आजको लोकतान्त्रिक समाजमा प्रश्न उठाउनु नै उत्तरदायित्वको पहिलो पाइला हो। यदि मन्त्रीहरूले आफ्नो सम्पत्तिको स्रोत स्पष्ट रूपमा सार्वजनिक गर्छन् भने, त्यसले उनीहरूको विश्वसनीयता अझ बलियो बनाउँछ। अन्यथा, “नयाँ अनुहार” भन्ने नारामाथि नै प्रश्न उठ्न थाल्छ।

न्यायालयमार्फत वा सार्वजनिक दबाबमार्फत पनि सम्पत्तिको स्रोत खोजिन सक्ने कानुनी व्यवस्था छ। त्यसैले अहिलेको आवश्यकता केवल विवरण सार्वजनिक गर्नु मात्र होइन, स्रोतसहितको पारदर्शिता सुनिश्चित गर्नु हो।

सुशासनको आधार केवल घोषणामा होइन, व्यवहारमा देखिनुपर्छ। अनि त्यो व्यवहार सुरु हुन्छ—स्रोत खुलाउने साहसबाट।

@ कुन मन्त्रीकाे देखाइएको सुन कति:

# प्रधानमन्त्री बालेज शाहसँग सुनका गहना- १९० ताेला ।

# स्वाणिम वाग्ले – ४५ ताेला, शिशिर खनाल- २२ ताेला

# सुधन गुरुङ ८९ ताेला,सुनिल लम्साल -३० ताेला

# साेविता गाैतम- १५ ताेला,सिता बादी १८ ताेला

# प्रतिभा रावल – २५ ताेला,निशा मेहता- ३० ताेला,

सस्मित पाेखरेल- २५ ताेला, गीता चाैधरी ५ ताेला

# खड्कराज पाैडेल- ११ ताेला,विक्रम तिमिल्सिना १९.५ ताेला,

#गाैरीकुमारी यादव १८० ताेला सुन

# रामजी यादवव ८० ताेला सुन