२०८३ असोज १४, बुधबार
पुल भत्कियाे- रणनीतिक तथा संवेदनशील क्षेत्रमा रहेको महत्वपूर्ण सम्पर्क पूर्वाधारमा क्षति
श्रीखबर/कञ्चनपुर दोधारा–चाँदनीलाई भीमदत्त नगरपालिकासँग जोड्ने महाकाली नदीमाथिको झोलुङ्गे पुल भत्किएको छ। पछिल्लो बाढी र नदीको तीव्र बहावका कारण पुलको संरचनामा क्षति पुगेको देखिन्छ। पुलको केही भाग नदीमा ढलेको तथा महाकालीमा अझै तीव्र बहाव देखिन्छ।
पुलको क्षतिको विस्तृत विवरण, मानवीय क्षति तथा भत्किनुको प्राविधिक कारणबारे सम्बन्धित निकायबाट औपचारिक विवरण आउन बाँकी छ। दोधारा–चाँदनीका लागि यो पुल सामान्य आवागमनको संरचना मात्र होइन, लामो समयसम्म मूल भूभागसँगको सम्पर्क जोड्ने महत्वपूर्ण जीवनरेखा का रूपमा रहेको थियो।
पुललाई महाकाली नदीमाथि रहेको नेपालकै सबैभन्दा लामो झोलुङ्गे पुलका रूपमा उल्लेख गरेको छ।
२०५८ सालतिर निर्माण भएको करिब डेढ किलोमिटर लामो यो पुलले महाकालीपारिको दोधारा–चाँदनीलाई नेपालका अन्य भूभागसँग सहज रूपमा जोड्न महत्वपूर्ण भूमिका खेलेको थियो। पुल बनेपछि स्थानीय उत्पादन, दैनिक आवागमन तथा सामाजिक–आर्थिक गतिविधिमा ठूलो सहजता आएको विवरणहरूमा उल्लेख छ।
पछिल्ला वर्षमा चार लेनको पक्की पुल निर्माण भएपछि झोलुङ्गे पुलमाथिको निर्भरता केही घटे पनि यसको सामाजिक, स्थानीय आवागमन तथा पर्यटकीय महत्व कायमै थियो। पुलको क्षतिले भने महाकालीको बाढी, नदी कटान र संवेदनशील सीमावर्ती क्षेत्रमा पूर्वाधारको जोखिम व्यवस्थापन माथि फेरि गम्भीर प्रश्न उठाएको छ।
