२०८३ असाेज १२, साेमबार
श्रीखबर/तीन दिनको अविरल वर्षापछि उर्लिएका नदी तथा खोलानाला विस्तारै सामान्य बहावमा फर्कन थालेका छन्। लगातारको वर्षाका कारण देशका विभिन्न स्थानमा बाढी, पहिरो र डुबानको जोखिम बढे पनि वर्षा कम हुँदै गएसँगै नदी–खोलाको सतह घट्न थालेको हो।
वर्षाले नदी तथा खोलामा पानीको बहाव बढाउँदा आसपासका बस्ती र सडकमा त्रास सिर्जना भएको थियो। कतिपय स्थानमा बाढीले भौतिक संरचनामा क्षति पुर्याउनुका साथै जनजीवनसमेत प्रभावित बनाएको छ।
यसैबीच, बाग्लुङमा वर्षाका कारण गएको पहिरोमा परी १० जनाको मृत्यु भएको छ भने एक जना बेपत्ता छन्। पहिरोमा परी भएको मानवीय क्षतिले निरन्तरको वर्षासँगै पहाडी क्षेत्रमा बढेको जोखिमलाई थप गम्भीर बनाएको छ।
अविरल वर्षा रोकिएसँगै नदी–खोलाको बहाव घट्दै गए पनि पहाडी क्षेत्रमा पहिरोको जोखिम भने तत्कालै समाप्त भएको छैन। भिजेको जमिन, कमजोर सडक र पहिरोले अवरुद्ध भएका मार्गका कारण यात्रा गर्दा अझै सावधानी आवश्यक देखिन्छ।
नदीहरू विस्तारै ‘लय’मा फर्किए पनि वर्षाले छाडेको क्षतिको पीडा र जोखिमको प्रभाव भने तत्कालै अन्त्य हुने अवस्था छैन।




