२०८३ साउन १, शुक्रबार

श्रीखबर/काठमाडौं। नेपालको डिजिटल रूपान्तरणसँगै प्रविधि क्षेत्रमा नयाँ पुस्ताका प्रतिभाशाली बालबालिकाको सहभागिता बढ्दै गएको छ। यसैक्रममा युवा वैज्ञानिक प्रविधि अधिकारी प्रतिष्ठित यङ साइन्टिस्ट प्रोग्राम (Young Scientist Program) मा सहभागी भएकी छन्।

STEM.org र दुरसिक्ष्या (Dursikchya Education Network) को सहकार्यमा सञ्चालन हुने यस अन्तर्राष्ट्रिय कार्यक्रमले बालबालिकामा वैज्ञानिक सोच, सिर्जनशीलता र प्रविधिमार्फत वास्तविक समस्याको समाधान गर्ने क्षमता विकास गर्ने लक्ष्य राखेको छ। यस कार्यक्रममा सहभागी भएपछि प्रविधिले आफ्नो व्यक्तिगत क्षमता अभिवृद्धि गर्ने मात्र नभई विज्ञान, प्रविधि, इन्जिनियरिङ र गणित (STEM) क्षेत्रमा करियर बनाउन चाहने नेपाली बालिकाहरूका लागि प्रेरणादायी उदाहरण प्रस्तुत गरेकी छन्।

कार्यक्रममार्फत सहभागी विद्यार्थीहरूले कोडिङ, गेम डेभलपमेन्ट, कम्प्युटेसनल थिंकिङ, सहकार्यमा समस्या समाधान गर्ने सीप तथा भविष्यका लागि आवश्यक प्राविधिक दक्षता हासिल गर्ने अवसर पाउनेछन्।

* परिवारबाटै प्रविधिप्रतिको प्रेरणा

प्रविधिको सफल यात्रापछाडि परिवारको महत्वपूर्ण भूमिका रहेको बताइएको छ। उनका पिता चिरञ्जीवी अधिकारी कम्प्युटर एसोसिएसन नेपाल महासंघ (CAN Federation) का कार्यवाहक अध्यक्ष, साइबर सुरक्षा विज्ञ तथा वन कभर प्रालिका संस्थापक तथा प्रमुख कार्यकारी अधिकृत (CEO) हुन्।

त्यस्तै उनकी आमा नेपालकै अग्रणी द्विभाषिक सूचना तथा सञ्चार प्रविधि (ICT) सम्बन्धी अनलाइन माध्यम ICT Frame Magazine की संस्थापक तथा अध्यक्ष हुन्।

प्रविधिले बाल्यकालदेखि नै साइबर सुरक्षा, सूचना प्रविधि र डिजिटल नवप्रवर्तनसँग नजिकबाट परिचित हुने अवसर पाएकी कारण प्रविधि प्रयोगकर्तामात्र नभई सिर्जनाकर्ताका रूपमा अघि बढ्ने प्रेरणा पाएको बताइएको छ।

* विश्वस्तरीय STEM शिक्षामा पहुँच

प्रविधिका अभिभावकले नेपालमा अन्तर्राष्ट्रियस्तरको STEM शिक्षा विस्तार गर्न दुरसिक्ष्या एजुकेसन नेटवर्कले खेलेको भूमिकाको प्रशंसा गरेका छन्। दुरसिक्ष्याले अमेरिकास्थित प्रतिष्ठित STEM.org सँगको सहकार्यमार्फत नेपालमा विश्वस्तरीय शिक्षण तथा सिकाइ प्रणाली भित्र्याएको छ। यसले विद्यार्थीहरूलाई केवल प्राविधिक सीपमा सीमित नराखी विश्लेषणात्मक सोच, तार्किक क्षमता, नवप्रवर्तन र समस्या समाधान गर्ने दक्षता विकासमा केन्द्रित गरिरहेको जनाइएको छ।

यस कार्यक्रममार्फत नेपालका बालबालिकाले अन्तर्राष्ट्रिय मापदण्डअनुसारको STEM शिक्षामा पहुँच पाउने विश्वास गरिएको छ। साथै, प्रविधि अधिकारीको सहभागिताले विशेषगरी प्रविधि क्षेत्रमा अघि बढ्न चाहने नेपाली बालिकाहरूलाई थप आत्मविश्वास र प्रेरणा प्रदान गर्ने अपेक्षा गरिएको छ।