२०८३ असार १८, बिहीबार
@ ज्ञानेन्द्र पाेख्रेल
श्रीखबर / बर्दिया,भूमि समस्या समाधान आयोगले देशव्यापी भूमिहीनलाई जग्गाधनी प्रमाण–पुर्जा (लालपुर्जा) वितरण अभियानको शुभारम्भ बर्दियाबाट गरेको छ।
अभियानअन्तर्गत पहिलो चरणमा बर्दियाको बढैयाताल गाउँपालिका–४ मा बसोबास गर्दै आएका २९ जना भूमिहीन दलित तथा भूमिहीन सुकुम्बासी परिवारलाई जग्गाधनी प्रमाण–पुर्जा वितरण गरिएको छ।
भूमि समस्या समाधान आयोग र बढैयाताल गाउँपालिकाको संयुक्त आयोजनामा सम्पन्न कार्यक्रममा जिल्ला भूमि समस्या समाधान समितिका अध्यक्ष तथा बर्दियाका प्रमुख जिल्ला अधिकारी गोगनबहादुर हमालको अध्यक्षता रहेको थियो।
कार्यक्रमका प्रमुख अतिथि भूमि समस्या समाधान आयोगका केन्द्रीय अध्यक्ष बलभद्र बाँस्तोला रहेका थिए। बढैयाताल गाउँपालिका–४ अन्तर्गत मान नदी किनार क्षेत्रमा वर्षौंदेखि बसोबास गर्दै आएका २९ परिवारलाई लालपुर्जा प्रदान गर्दै अभियानको औपचारिक शुभारम्भ गरिएको हो।
कार्यक्रममा बोल्दै प्रमुख अतिथि बाँस्तोला तथा अन्य वक्ताहरूले देशव्यापी रूपमा भूमिहीनलाई लालपुर्जा वितरण अभियानको सुरुआत बर्दियाबाट गरिएको घोषणा गर्दै सरकारले आगामी ५०० दिनभित्र भूमिसम्बन्धी समस्याको दीर्घकालीन समाधान गर्ने प्रतिबद्धता व्यक्त गरे।
वक्ताहरूले भूमिहीन दलित, भूमिहीन सुकुम्बासी तथा अव्यवस्थित बसोबासीको समस्या समाधान गरी उनीहरूलाई कानुनी रूपमा जग्गाको स्वामित्व प्रदान गर्ने सरकारको अभियानलाई प्रभावकारी रूपमा अगाडि बढाइने बताए।
लामो समयदेखि जग्गाको स्वामित्वबाट वञ्चित स्थानीयले लालपुर्जा प्राप्त गरेपछि खुशी व्यक्त गर्दै यसले उनीहरूको जीवनमा स्थायित्व र आर्थिक–सामाजिक सुरक्षाको आधार तयार भएको बताएका छन्।
