२०८३ जेष्ठ ३०, शुक्रबार
श्रीखबर/काठमाडौँ।समस्याग्रस्त सहकारीका बचतकर्ताको रकम फिर्ता गर्ने कार्यलाई सरकारले निरन्तरता दिएको छ। समस्याग्रस्त सहकारी व्यवस्थापन समितिले शिव शिखर बहुउद्देश्यीय सहकारीका थप २१६ जना साना बचतकर्तालाई बचत रकम फिर्ता गरेसँगै लामो समयदेखि आफ्नो बचत फिर्ताको प्रतीक्षामा रहेका हजारौं बचतकर्तामा नयाँ आशा सञ्चार भएको छ।
समितिका अनुसार यसअघि वितरण गरिएको रकमसहित हालसम्म कुल १ हजार ३१३ जना साना बचतकर्ताले आफ्नो बचत रकम फिर्ता पाइसकेका छन्। सहकारीबाट ऋण असुली तथा सम्पत्ति व्यवस्थापनमार्फत प्राप्त रकमलाई कानुनी प्रक्रियाअनुसार बचतकर्तालाई फिर्ता गर्ने कार्य जारी रहेको जनाइएको छ।
सहकारी क्षेत्रमा देखिएको संकटका कारण लाखौं रुपैयाँ बचत फसेर आर्थिक र मानसिक पीडा भोगिरहेका नागरिकका लागि पछिल्लो कदमलाई राज्यको अभिभावकीय जिम्मेवारीको सकारात्मक अभ्यासका रूपमा हेरिएको छ। विशेषगरी साना बचतकर्तालाई प्राथमिकतामा राखेर रकम फिर्ता गर्न थालिनुले सर्वसाधारण नागरिकको हित संरक्षणमा सरकार प्रतिबद्ध रहेको सन्देश दिएको छ।
समितिका अनुसार समस्याग्रस्त सहकारीहरूमा करिब ७६ हजार बचतकर्ताको झण्डै ४६ अर्ब रुपैयाँ बराबरको बचत फिर्ता गर्न बाँकी छ। तीमध्ये अधिकांश साना बचतकर्ता रहेका छन्। पाँच लाख रुपैयाँभन्दा कम बचत भएका व्यक्तिलाई साना बचतकर्ता र सोभन्दा बढी बचत भएकालाई ठूला बचतकर्ताका रूपमा वर्गीकरण गरिएको छ।
कुल बचतकर्तामध्ये करिब १८ हजार जना पाँच लाख रुपैयाँभन्दा बढी बचत गर्ने समूहमा पर्छन्। सरकारले पहिलो चरणमा कम रकम बचत गरेका नागरिकलाई राहत दिने रणनीति अवलम्बन गरेको छ। यसले दैनिक जीवन सञ्चालनमै समस्या भोगिरहेका परिवारलाई प्रत्यक्ष राहत पुग्ने अपेक्षा गरिएको छ। क्रमशः बचत रकमको आधारमा वर्गीकरण गरी अन्य बचतकर्तालाई पनि रकम फिर्ता गर्ने समितिले जनाएको छ।
सहकारी पीडितहरूका लागि रकम फिर्ताको यो प्रक्रिया केवल आर्थिक राहत मात्र नभई राज्यप्रति विश्वास पुनःस्थापित गर्ने प्रयासका रूपमा पनि हेरिएको छ। लामो समयदेखि अन्योलमा रहेका बचतकर्ताले रकम फिर्ता पाउन थालेपछि बाँकी पीडितहरूमा पनि आफ्नो बचत फिर्ता हुने आशा बढेको छ।
सरकारले ऋण असुली तथा सम्पत्ति व्यवस्थापनको कार्यलाई थप प्रभावकारी बनाउँदै बचतकर्ताको रकम फिर्ता प्रक्रियालाई तीव्रता दिन सके सहकारी क्षेत्रप्रतिको जनविश्वास पुनर्निर्माणमा समेत महत्वपूर्ण योगदान पुग्ने अपेक्षा गरिएको छ।
