२०८२ फागुन २५, साेमबार

श्रीखबर/ चितवनको प्रमुख आतिथ्य गन्तव्य रहेकाे हाेटल सिराइचुली ( Hotel Siraichuli Narayangarh) अब अन्तर्राष्ट्रिय होटल ब्रान्ड Best Western Hotels & Resorts सँग औपचारिक रूपमा आबद्ध भएको छ। दुवै पक्षबीच होटल व्यवस्थापन सम्बन्धी सम्झौतामा हस्ताक्षर भएसँगै होटल सिराइचुली ‘बेस्ट वेष्टर्न’ ब्रान्ड अन्तर्गत सञ्चालन हुने भएको हो।

यस साझेदारीसँगै होटल सिराइचुलीले विश्वस्तरीय आतिथ्य मापदण्ड, उन्नत व्यवस्थापन प्रणाली, अन्तर्राष्ट्रिय सेवा प्रोटोकल र ग्लोबल रिजर्भेसन नेटवर्कमा पहुँच प्राप्त गर्नेछ। यसले चितवन आउने स्वदेशी तथा विदेशी पाहुनालाई अझ स्तरीय सेवा र सुविधा उपलब्ध गराउने विश्वास गरिएको छ।

सम्झौतापछि होटल सिराइचुलीले बेस्ट वेष्टर्नको अन्तर्राष्ट्रिय परिचालन प्रणाली, लोयल्टी प्रोग्राम र सेवा मापदण्डलाई अपनाउँदै पाहुनाहरूलाई विश्वस्तरीय अनुभव प्रदान गर्ने लक्ष्य लिएको छ।

होटल सिराइचुलीका अध्यक्ष चुडामणिा खनालका अनुसार यो साझेदारी होटलका लागि महत्वपूर्ण मोड हो। “बेस्ट वेष्टर्नसँगको सहकार्यले हामीलाई नेपालको मौलिक न्यानोपन र संस्कृतिलाई कायम राख्दै अन्तर्राष्ट्रिय स्तरको आतिथ्य सेवा प्रदान गर्ने अवसर दिएको छ,” अध्यक्ष खनालले भन्नुभयाे ।

यस्तै, बेस्ट वेष्टर्न होटल्स नेपालका सीओओ अन्जन बेलवासेले होटल सिराइचुलीलाई आफ्नो सञ्जालमा स्वागत गर्न पाउँदा खुशी लागेको बताउनुभयो ।

सीओओ बेलवासेका अनुसार होटलको रणनीतिक स्थान, आधुनिक सुविधा र उत्कृष्ट सेवाले यसलाई ‘बेस्ट वेष्टर्न’ परिवारमा महत्वपूर्ण थप बनाएको छ।

नारायणगढ चितवनको प्रमुख व्यापारिक तथा पर्यटकीय केन्द्र मानिन्छ। साथै यहाँबाट  चितवन नेसनल पार्क [Chitwan National Park] जाने पर्यटकहरूका लागि पनि यो मुख्य प्रवेशद्वार हो। यस्तो रणनीतिक स्थानमा रहेको होटल सिराइचुलीले व्यापारिक तथा पर्यटकीय दुवै प्रकारका पाहुनालाई सेवा दिँदै आएको छ।

चितवनको व्यावसायिक केन्द्रमा अवस्थित होटल सिराइचुली आधुनिक सुविधा, आरामदायी बसाइ र उत्कृष्ट आतिथ्य सेवाका लागि परिचित प्रिमियम होटल हो। अन्तर्राष्ट्रिय ब्रान्डसँगको आबद्धताले अब होटललाई विश्व बजारसँग जोड्ने अपेक्षा गरिएको छ।

उल्लेखनीय छ, बेस्ट वेष्टर्न होटल्स एण्ड रिसोर्ट्स विश्वका अग्रणी होटल ब्रान्डमध्ये एक हो, जसका होटलहरू १०० भन्दा बढी देश र क्षेत्रहरूमा सञ्चालनमा छन्।