२०८२ माघ ९,शुक्रबार
श्रीखबर/गैँडाकोट,नवलपुरको गैँडाकोट–२ स्थित नारायणी नदी किनारमा जारी चौथो गैँडाकोट महोत्सव आज थप रौनकपूर्ण बन्दैछ।
चर्चित लोकदोहोरी गायक पुष्कल शर्मा आज शुक्रबार महोत्सवमा विशेष प्रस्तुती भएको छ। महोत्सवको सांस्कृतिक कार्यक्रम संयोजक किशोर लम्सालका अनुसार आजको कार्यक्रममा पुष्कल शर्मासँगै कला लम्साल, राशी रिजाल, बन्दना विश्वकर्मा, राकेश विकलगायत कलाकारको आकर्षक प्रस्तुती दिए।
पुस २५ गतेदेखि सुरु भएको महोत्सव आज १५ औँ दिनमा प्रवेश गरेको छ। आयोजक जिल्ला उद्योग वाणिज्य संघ गैँडाकोट, नवलपुरका अनुसार हालसम्म करिब दुई लाख दर्शकले महोत्सव अवलोकन गरिसकेका छन्।
संघका वरिष्ठ सदस्य तथा प्रचारप्रसार उपसमिति संयोजक शालिकराम सापकोटाले महोत्सव भाेली माघ १० गतेसम्म सञ्चालन हुने जानकारी दिए। महोत्सवमा कृषि प्रदर्शनी, व्यापारिक स्टल, रेष्टुरेन्ट, बाल उद्यानसहित २५० भन्दा बढी स्टल रहेका छन्।
संघका महासचिव तथा महोत्सव सचिवालय संयोजक तेजनारायण पाण्डेका अनुसार १६ दिनसम्म सञ्चालन हुने महोत्सवबाट २५ करोड रुपैयाँभन्दा बढी आर्थिक कारोबार हुने अनुमान गरिएको छ।
स्थानीय कृषि तथा उत्पादनको प्रवर्द्धन र बजारीकरण नै महोत्सवको मुख्य उद्देश्य रहेको उनले बताए। महोत्सव अवलोकनका लागि साधारण टिकट १०० रुपैयाँ र विद्यार्थीका लागि ७० रुपैयाँ निर्धारण गरिएको छ।
ज्येष्ठ नागरिक, अशक्त, अपाङ्ग तथा शैक्षिक संस्थाबाट संस्थागत रूपमा आएका विद्यार्थीलाई निःशुल्क प्रवेशको व्यवस्था गरिएको आयोजकले जनाएको छ।
