२०८२ माघ ६, मँगलबार

@ कृष्ण खनाल

श्रीखबर/नवलपुरको गैँडाकोट–२ स्थित नारायणी नदी किनारमा जारी चौथो गैँडाकोट महोत्सव ले दर्शक संख्यामा ऐतिहासिक सफलता हासिल गरेको छ ।

महोत्सव सुरु भएको १२औँ दिनसम्म आइपुग्दा १ लाख ७० हजारभन्दा बढी दर्शकले महोत्सव अवलोकन गरेका छन् । महोत्सव आयोजक संस्था जिल्ला उद्योग वाणिज्य संघ गैँडाकोट का वरिष्ठ सदस्य तथा प्रचारप्रसार उपसमिति संयोजक शालिकराम सापकोटा का अनुसार महोत्सवप्रति दर्शकको उत्साह दिनप्रतिदिन बढ्दो क्रममा रहेको छ ।

उनका अनुसार महोत्सव अवलोकनका लागि नवलपुर मात्र नभई चितवन, तनहुँसहित विभिन्न जिल्लाबाट दर्शकहरूको उल्लेख्य उपस्थिति रहेको छ । स्थानीय उत्पादन, कृषि, कला र संस्कृतिको संरक्षण तथा प्रवर्द्धन गर्ने उद्देश्यले आयोजना गरिएको महोत्सवमा ओपेरा हाउस, जलपरी शो, मुस्ताङको चौरी प्रदर्शनी लगायतका आकर्षणले दर्शकको ध्यान तानेका छन् । महोत्सव माघ १० गतेसम्म सञ्चालन हुनेछ ।

महोत्सव स्थलमा कृषि प्रदर्शनी, अटोमोबाइल, रेष्टुरेन्ट तथा व्यापारिक गरी २५० स्टल राखिएका छन् । बालबालिकाका लागि विशेष बालउद्यान को व्यवस्था गरिएको छ । महोत्सवले स्थानीय कृषि उत्पादन र उद्यमको बजारीकरणमा महत्वपूर्ण भूमिका खेल्ने विश्वास आयोजकले व्यक्त गरेका छन् ।

* २ लाख दर्शक र २५ करोड कारोबारको लक्ष्य-

संघका अध्यक्ष तथा महोत्सवका संरक्षक दीपक सापकोटा ले महोत्सवमार्फत स्थानीय उत्पादनको प्रवर्द्धन र बजारीकरण नै मुख्य उद्देश्य रहेको बताए ।

उनले भने`महोत्सव अवधिभर २ लाख दर्शकले अवलोकन गर्ने र २५ करोड रुपैयाँभन्दा बढीको कारोबार हुने अनुमान गरिएको छ ।´- महोत्सव प्रवेश शुल्क सर्वसाधारणका लागि १०० रुपैयाँ र विद्यार्थीका लागि ७० रुपैयाँ तोकिएको छ । ज्येष्ठ नागरिक, अशक्त, अपाङ्ग तथा शैक्षिक संस्थाबाट संस्थागत रूपमा आएका विद्यार्थीहरूलाई निःशुल्क प्रवेश को व्यवस्था गरिएको आयोजकले जनाएको छ ।

* सांस्कृतिक कार्यक्रममा राष्ट्रिय कलाकारको धमाका

महोत्सवको सांस्कृतिक कार्यक्रम अन्तर्गत मंगलबार चर्चित गायिका शान्तिश्री परियार, सिर्जना खत्री ‘हाउडे माया’ लगायतका कलाकारले दर्शकलाई मनोरञ्जन प्रदान गरेका छन् ।

सांस्कृतिक कार्यक्रम संयोजक किशोर लम्साल का अनुसार सीमा थापा मगर, दामोदर बस्याल तथा अन्य स्थानीय कलाकारहरूको पनि प्रस्तुति रहेको थियो ।

त्यस्तै बुधबार प्रजापति पराजुली, चर्चित गायिका रचना रिमाल सहित उमादेवी खनाल, जादुगर बलराम गिरी, वन्दना विश्वकर्मा लगायतका कलाकारहरूको प्रस्तुति रहने आयोजकले जानकारी दिएका छन् ।