२०८२ पुष २६, शनिबार
श्रीखबर/गैँडाकोट, नवलपुरको गैँडाकोट–२ स्थित नारायणी नदीकिनारमा सुरु भएको चौथो संस्करणको गैँडाकोट महोत्सवमा आज लोकप्रिय गायक प्रकाश सपूतसहित राष्ट्रिय तथा स्था नीय कलाकारहरूको आकर्षक सांगीतिक प्रस्तुति हुने भएको छ।
महोत्सवको सांस्कृतिक कार्यक्रम संयोजक किशोर लम्सालका अनुसार शनिबारको कार्यक्रम महोत्सवकै मुख्य आकर्षणका रूपमा रहेको छ। आजको सांस्कृतिक कार्यक्रममा गायक प्रकाश सपूतसँगै गायिका सीता राजना, गायक तथा प्रस्तोता दीपक खड्का, सन्तोष सुवेदीलगायत ख्यातिप्राप्त राष्ट्रिय तथा स्थानीय कलाकारहरूले प्रस्तुति दिए।
संयोजक लम्सालका अनुसार महोत्सव अवधिभर हरेक दिन राष्ट्रिय स्तरका ख्यातिप्राप्त कलाकार तथा स्थानीय प्रतिभाहरूको प्रस्तुति रहनेछ। महोत्सवकै अवसरमा राष्ट्रिय भजन प्रतियोगिता आयोजना गरिएको छ भने जातीय नृत्य, विद्यालयस्तरीय नृत्य तथा विविध सांस्कृतिक कार्यक्रमसमेत समावेश गरिएका छन्।
आगामी दिनहरूमा महोत्सवको सांस्कृतिक मञ्चमा समीक्षा अधिकारी, हिमाल सागर, शिव परियार, रमेशराज भट्टराई, मेलिना राई, रचना रिमाललगायत चर्चित कलाकारहरूको प्रस्तुति रहने आयोजकले जानकारी दिएको छ।
माघ १० गतेसम्म सञ्चालन हुने महोत्सवलाई करिब दुई लाख दर्शकले अवलोकन गर्ने तथा २५ करोड रुपैयाँभन्दा बढी आर्थिक कारोबार हुने अपेक्षा गरिएको छ।
महोत्सव प्रवेशका लागि सर्वसाधारणका लागि १०० रुपैयाँ र विद्यार्थीका लागि ७० रुपैयाँ टिकट दर तोकिएको छ। साथै अपाङ्गता भएका व्यक्ति, ज्येष्ठ नागरिक तथा शैक्षिक संस्थाबाट सामूहिक रूपमा सहभागी विद्यार्थीहरूलाई निःशुल्क प्रवेशको व्यवस्था गरिएको आयोजक समितिले जनाएको छ।
स्थानीय उत्पादनको प्रवर्द्धन, सांस्कृतिक संरक्षण र पर्यटन प्रवाह बढाउने उद्देश्यसहित आयोजना गरिएको गैँडाकोट महोत्सवले नारायणी किनारलाई पुनः सांस्कृतिक उत्सवस्थलको रूपमा स्थापित गरिरहेको आयोजकको दाबी छ।
