२०८२ पुष २२, मङ्गलबार

श्रीखबर। चौथो गैँडाकोट महोत्सव नजिकिँदै जाँदा नारायणी नदी किनारस्थित महोत्सव स्थलमा तयारी तीव्र पारिएको छ। जिल्ला उद्योग वाणिज्य संघ गैँडाकोट, नवलपरासी (बर्दघाट–सुस्तापूर्व) को आयोजनामा गैँडाकोट–२ मा सञ्चालन हुन लागेको महोत्सवमा यस वर्ष जलपरी (मर्मेड शो) र फिस टनेल मुख्य आकर्षणका रूपमा प्रस्तुत गरिने भएको छ।

आयोजकका अनुसार महोत्सव स्थलमा धमाधम स्टल निर्माण भइरहेको छ। संघका वरिष्ठ उपाध्यक्ष एवम् महोत्सव मूल आयोजक समिति संयोजक छवि कँडेलले महोत्सवको मूल गेट निर्माण सम्पन्न भइसकेको जानकारी दिए।

प्रवेशद्वारलाई मौलाकालिका मन्दिरको गेटको आकारमा तयार पारिँदा धार्मिक तथा पर्यटकीय पहिचानलाई समेत जोड दिइएको उनले बताए। कँडेलका अनुसार महोत्सव स्थलमा स्टलसँगै बाल उद्यान, जलपरी शो तथा माछाको टनेल निर्माणको काम तीव्रगतिमा अगाडि बढिरहेको छ। “महोत्सवलाई सभ्य, भव्य र सुरक्षित बनाउने हाम्रो प्राथमिकता हो,” उनले भने।

@ सुरक्षा व्यवस्था चुस्त

महोत्सवको सुरक्षालाई विशेष प्राथमिकतामा राख्दै स्थल वरिपरि बार लगाउने, सिसिटिभी क्यामेरा जडान गर्ने तथा आन्तरिक र बाह्य सुरक्षा प्रबन्ध मिलाइएको आयोजकले जनाएको छ।

संघका सदस्य एवम् महोत्सव प्रचारप्रसार उपसमिति संयोजक शालिकराम सापकोटाका अनुसार सुरक्षासम्बन्धी विषयमा इलाका प्रहरी कार्यालय गैँडाकोट र सशस्त्र प्रहरी बल पितौजीसँग समन्वय गरी आवश्यक छलफल सम्पन्न भइसकेको छ। “महोत्सवलाई शान्तिपूर्ण र सुरक्षित रूपमा सम्पन्न गर्न सुरक्षासमितिसँग नियमित समन्वय भइरहेको छ,” सापकोटाले बताए।

त्यस्तै, कृषि परिसरलाई समेत आकर्षक बनाउने उद्देश्यले सम्बन्धित समितिसँग छलफल गरी तयारी अगाडि बढाइएको छ। व्यवस्थापन र सुविधा महोत्सव सचिवालय संयोजक एवम् संघका महासचिव तेजनारायण पाण्डेले महोत्सवको आन्तरिक तयारी अन्तिम चरणमा पुगेको जानकारी दिए।

उनका अनुसार उद्घाटनका दिन निकालिने शोभायात्रालाई प्रभावकारी बनाउन स्टेरिङ समिति तथा विभिन्न संघसंस्थासँग समन्वय भइरहेको छ। महोत्सव स्थलमा सिसिटिभीमार्फत निगरानी, एम्बुलेन्स सेवा, प्राथमिक उपचार कक्ष, मिडिया सेन्टर, पार्किङ तथा स्वच्छता व्यवस्थापनको व्यवस्था रहने पाण्डेले बताए।

यस वर्षको महोत्सवमा रेष्टुरेन्ट, बाल उद्यान, जलपरी तथा फिस टनेल, ओपेरा हाउस, उद्योग तथा वाणिज्य, अटो लगायत छुट्टाछुट्टै परिसर रहनेछन्। प्रदर्शनी कक्षलाई पेगोडा शैलीमा निर्माण गरिएको हुँदा महोत्सवस्थल यसपटक फरक र आकर्षक देखिने आयोजकको दाबी छ।

चौथो गैँडाकोट महोत्सव यही पुस २५ गतेदेखि माघ १० गतेसम्म नारायणी नदी किनारमा सञ्चालन हुनेछ।