२०८२ पुष १७, बिहीबार
@ कृष्ण खनाल
श्रीखबर / गैँडाकोट गैँडाकोटकाेनारायणी नदी किनारमा सञ्चालन हुने चौथो संस्करणको `गैंडाकोट महोत्सव तथा व्यापार मेला-२०८२ को तयारी तीव्र पारिएको छ।
स्थानीय उत्पादनको प्रवर्द्धन र बजारीकरण गर्ने उद्देश्यसहित आयोजना हुन लागेको महोत्सव आगामी पुस २५ देखि माघ १० गतेसम्म सञ्चालन हुनेछ। महोत्सवको मुख्य आकर्षणका रूपमा यस वर्ष ‘जलपरी’ राखिने भएको छ। आयोजक जिल्ला उद्योग वाणिज्य सङ्घ गैंडाकोटका अनुसार जलपरीसँग दर्शकले फोटो र भिडियो खिच्न सक्ने व्यवस्था मिलाइँदैछ।
महोत्सवका मूल संयोजक तथा सङ्घका वरिष्ठ उपाध्यक्ष छवि कँडेलका अनुसार हालसम्म महोत्सवको तयारी ६० प्रतिशत सम्पन्न भइसकेको छ। “महोत्सवस्थल छुट्याउने र नारायणी नदी किनार सम्याउने काम पूरा भइसकेको छ,” उनले भने।
स्थानीय कृषि र महिला उद्यमशीलतामा जोड महोत्सवमा स्थानीय कृषि उत्पादनलाई विशेष प्राथमिकता दिइएको आयोजकको भनाइ छ।
कँडेलका अनुसार स्थानीय उत्पादन अदुवाको जाम यस वर्षको प्रमुख आकर्षण हुनेछ। यसका साथै जिल्लाका किसानले उत्पादन गरेका दूधजन्य पदार्थ, अन्य कृषि उपज तथा महिला उद्यमीले उत्पादन गरेका सामग्रीहरू पनि प्रदर्शनी तथा बिक्रीका लागि राखिनेछन्।
त्यसैगरी महोत्सवमा विश्वविख्यात पाकिस्तानी लेदर, बंगलादेशी गार्मेन्ट तथा स्थानीय उद्योगबाट उत्पादित सामग्रीसमेत समावेश गरिनेछ।
— महोत्सवको थप आकर्षण:ओपेरा हाउसको विशेष डोम, सांस्कृतिक कार्यक्रमको रौनक **
अष्ट्रेलियाको सांस्कृतिक घर ‘ओपेरा हाउस’**लाई विशेष डोम निर्माण गरेर प्रदर्शन गर्ने तयारी गरिएको छ।
सङ्घका अध्यक्ष तथा महोत्सवका संरक्षक दीपक सापकोटाले महोत्सवले नवलपुरको आर्थिक, सांस्कृतिक र पर्यटन प्रवर्द्धनमा महत्वपूर्ण योगदान दिने विश्वास व्यक्त गरे। उनका अनुसार महोत्सव अवधिभर २५ करोड रुपैयाँभन्दा बढी आर्थिक कारोबार हुने अपेक्षा गरिएको छ।
महोत्सव अवलोकनका लागि नवलपुर, चितवन, तनहुँसहित विभिन्न जिल्लाबाट दुई लाखभन्दा बढी दर्शक सहभागी हुने अनुमान गरिएको छ।
-चार क्षेत्रमा विभाजन, सुरक्षा र व्यवस्थापन चुस्त:
जिल्ला उद्योग वाणिज्य सङ्घ गैंडाकोटका महासचिव तथा महोत्सव सचिवालय संयोजक तेजनारायण पाण्डेका अनुसार महोत्सवलाई प्रदर्शनी तथा बिक्री कक्ष, सांस्कृतिक तथा सांगीतिक क्षेत्र, बाल उद्यान तथा मनोरञ्जन क्षेत्र, खानपान क्षेत्र गरी चार मुख्य भागमा विभाजन गरिएको छ।
महोत्सव प्रचारप्रसार उपसमिति संयोजक शालिकराम सापकोटाले महोत्सवमा राष्ट्रिय भजन प्रतियोगिता, राष्ट्रिय तथा स्थानीय कलाकारको दैनिक सांस्कृतिक प्रस्तुति, फेशन शो, विद्यालय तथा सांस्कृतिक समूहका कार्यक्रम सञ्चालन हुने जानकारी दिए।
सुरक्षाका लागि सिसिटिभी निगरानी, एम्बुलेन्स, प्राथमिक उपचार, मिडिया सेन्टर, पार्किङ तथा स्वच्छता व्यवस्थापनको व्यवस्था गरिने आयोजकले जनाएको छ।
नारायणी किनारमा आयोजना हुने गैंडाकोट महोत्सवले स्थानीय उत्पादनलाई राष्ट्रिय तथा अन्तर्राष्ट्रिय बजारसँग जोड्दै उद्योग, व्यापार, कृषि र पर्यटनमा नयाँ ऊर्जा थप्ने अपेक्षा गरिएको छ।
