२०८३ साउन १६, शनिबार
श्रीखबर/काठमाडौं, नेकपा एमालेले बागमती प्रदेशको मुख्यमन्त्रीका लागि प्रदेश संसदीय दलका नेता जगन्नाथ (जेएन) थपलियालाई अघि सार्ने अन्तिम निर्णय गरेको छ।
पार्टीभित्र देखिएको नेतृत्व विवाद सहमतिमै टुंगिएपछि थपलियाले बहुमत प्रदेशसभा सदस्यको समर्थनसहित प्रदेश प्रमुखसमक्ष मुख्यमन्त्री पदमा दाबी पेस गर्ने तयारी गरेका छन्।
नेकपा एमाले र नेपाल कम्युनिस्ट पार्टी (नेकपा) बीच भएको सत्ता साझेदारी सहमतिअनुसार बागमती प्रदेश सरकारको नेतृत्व एमालेले गर्ने निश्चित भएपछि मुख्यमन्त्री को बन्ने भन्ने विषयमा पार्टीभित्र विभिन्न तहमा छलफल र दाबीहरू अघि बढेका थिए। संसदीय दलका नेता जेएन थपलियासँगै प्रदेश सांसद किरण थापा र केशव पोखरेलले पनि नेतृत्वका लागि आकांक्षा व्यक्त गरेका थिए।
तर पार्टी नेतृत्वले अन्ततः संगठनात्मक एकता, संसदीय अभ्यास र नेतृत्व क्षमतालाई प्राथमिकता दिँदै थपलियामै विश्वास व्यक्त गरेको हो। अध्यक्ष केपी शर्मा ओली, सचिव महेश बस्नेत, बागमती प्रदेश अध्यक्ष कैलाश ढुंगेललगायत शीर्ष नेताको उपस्थितिमा भएको छलफलपछि थपलियालाई सर्वसम्मत रूपमा मुख्यमन्त्रीको उम्मेदवार बनाउने सहमति जुटेको हो।
एमाले बागमती प्रदेश कमिटीका उपाध्यक्ष दावा दोर्जे तामाङले पनि थपलियाको नेतृत्वमा कुनै परिवर्तन नभएको स्पष्ट पारे। उनले भने, “जेएन थपलिया हिजो पनि पार्टीको संसदीय दलका नेता हुनुहुन्थ्यो, आज पनि उहाँ नै मुख्यमन्त्रीका उम्मेदवार हुनुहुन्छ।
दलको नेतामा कुनै परिवर्तन हुँदैन, अब बहुमत सदस्यको समर्थनसहित उहाँले मुख्यमन्त्रीमा दाबी पेस गर्नुहुन्छ।” चितवन निर्वाचन क्षेत्र नं. १ (१) बाट निर्वाचित प्रदेशसभा सदस्य थपलिया यसअघि नै एमाले बागमती प्रदेश संसदीय दलको नेतामा सर्वसम्मत चयन भएका थिए।
पार्टीभित्र देखिएको मतभिन्नता संवाद र सहमतिबाट समाधान गर्दै नेतृत्वलाई एकताबद्ध बनाउन सफल भएको घटनालाई एमालेभित्र परिपक्व राजनीतिक अभ्यासका रूपमा समेत हेरिएको छ।
अब बहुमत प्रदेशसभा सदस्यको हस्ताक्षरसहित जेएन थपलियाले प्रदेश प्रमुखसमक्ष मुख्यमन्त्री पदमा औपचारिक दाबी पेस गर्ने तयारी गरेका छन्। यससँगै बागमती प्रदेशको नयाँ सरकार गठन प्रक्रिया निर्णायक चरणमा पुगेको छ।
