२०८३ असार २४, बुधबार
श्रीखबर/चितवन, असार २४ । चितवन राष्ट्रिय निकुञ्ज आसपासका बासिन्दाका लागि वर्षौंदेखि त्रासको पर्याय बनेको जंगली भाले हात्ती ‘ध्रुवे’ लाई पुनः नियन्त्रणमा लिएर नयाँ रेडियो कलर जडान गर्ने र उसका दाह्रा छोट्याउने तयारी गरिएको छ। मानव बस्तीमा पटक–पटक प्रवेश गरी हालसम्म २५ जनाको ज्यान लिइसकेको ध्रुवेमाथि निकुञ्ज प्रशासनले पुनः निगरानी बढाउने निर्णय गरेको हो।
यो निर्णय गत शनिबार भरतपुर महानगरपालिका–२३ मा भएको दर्दनाक घटनापछि गरिएको हो। ध्रुवेको आक्रमणबाट २१ वर्षीया आशिका बोटे र उनका ४ वर्षीय छोरा भरत बोटे को ज्यान गएपछि स्थानीयमा फेरि त्रास फैलिएको छ। घटनापछि ध्रुवेलाई प्रभावकारी रूपमा निगरानीमा राख्न निकुञ्ज प्रशासन सक्रिय भएको हो।
चितवन राष्ट्रिय निकुञ्जका प्रमुख संरक्षण अधिकृत डिलबहादुर पुर्जा पुन का अनुसार ध्रुवेलाई विशेष डार्ट प्रयोग गरी बेहोस बनाइनेछ। त्यसपछि उसका दाह्रा छोट्याइने र अत्याधुनिक रेडियो कलर जडान गरिनेछ।
निकुञ्जले यसअघि पनि ध्रुवेको दाह्रा छोट्याएको र रेडियो कलर जडान गरेको थियो। तर पुरानो उपकरणले समयमै हात्तीको अवस्थाबारे सूचना दिन छाडेपछि प्रभावकारी निगरानीमा समस्या देखिएको थियो। अब जडान गरिने नयाँ प्रविधियुक्त रेडियो कलरमार्फत ध्रुवे मानव बस्ती नजिक पुग्नेबित्तिकै सम्बन्धित निकाय र स्थानीय समुदायलाई तत्काल सूचना पुग्ने अपेक्षा गरिएको छ।
निकुञ्ज प्रशासनको विश्वास छ कि नयाँ प्रविधिले मानव–हात्ती द्वन्द्व न्यूनीकरण गर्न, स्थानीयको ज्यान जोगाउन र आवश्यक सतर्कता अपनाउन महत्वपूर्ण भूमिका खेल्नेछ। यद्यपि स्थानीयवासीले भने केवल निगरानी मात्र नभई ध्रुवेको आतंकबाट स्थायी समाधान खोज्न सरकारसँग माग गरिरहेका छन्।
वर्षौंदेखि चितवनका विभिन्न बस्तीमा आतंक मच्चाउँदै आएको ध्रुवेको नामसँग २५ जनाको मृत्यु जोडिइसकेको छ। पछिल्लो घटनाले फेरि मानव र वन्यजन्तुबीचको द्वन्द्व गम्भीर बन्दै गएको संकेत गरेको छ। अब निकुञ्ज प्रशासनले थालेको यो नयाँ प्रयासले स्थानीयको सुरक्षा कत्तिको सुनिश्चित गर्न सक्छ भन्ने चासो बढेको छ।
Advertisement
