२०८२ फागुन ६, बुधबार
श्रीखबर विश्लेषण
@ कृष्ण खनाल
प्रतिनिधि सभा निर्वाचनको मिति नजिकिँदै जाँदा गाउँघरदेखि सहरसम्म राजनीतिक गतिविधि तीव्र बन्दै गएका छन्। चुनावी माहोल ततिँदै जाँदा विभिन्न राजनीतिक दल तथा उम्मेदवारहरू मतदाता भेटघाट, घरदैलो र जनसम्पर्क अभियानलाई तीव्र बनाइरहेका छन्। मतदाताको मनोविज्ञान बुझ्दै आफ्नो पक्षमा माहोल बनाउन दलहरूबीच प्रतिस्पर्धा झन् चर्किएको देखिन्छ।
नेपालको स्थापित राजनीतिक शक्ति मानिने नेपाल कम्युनिस्ट पार्टी (एमाले) र नेपाली कांग्रेस जस्ता दलहरू विगतमा अन्य चिन्ह तथा नयाँ दलतर्फ आकर्षित भएका मतदातालाई पुनः आफ्नो पक्षमा फर्काउने रणनीतिमा सक्रिय देखिएका छन्। उनीहरूले स्थायित्व, अनुभव र पूर्वाधार विकासका उपलब्धिलाई चुनावी एजेण्डाको रूपमा प्रस्तुत गर्दै मतदातालाई विश्वास दिलाउने प्रयास गरिरहेका छन्।
विशेषगरी ग्रामीण क्षेत्रमा पुराना दलहरूले संगठन संरचना र कार्यकर्ता सञ्जाललाई सक्रिय बनाउँदै ‘स्थिर सरकार र दीर्घकालीन विकास’को नारालाई प्राथमिकता दिएका छन्।विगतका चुनावमा अन्य विकल्प रोजेका मतदातालाई पुनः आफ्नो चुनाव चिन्हमा मत हाल्ने वातावरण निर्माण गर्न उनीहरूले व्यापक जनसम्पर्क अभियान सञ्चालन गरिरहेका छन्।
यता वैकल्पिक राजनीतिक शक्तिका नाममा उदाएको राष्ट्रिय स्वतन्त्र पार्टी जस्ता दल भने फरक रणनीतिमा देखिएको छ। यस पार्टीले पुराना दलहरूलाई भ्रष्टाचार, राजनीतिक संरक्षणवाद र असफल शासन व्यवस्थाको प्रतीकका रूपमा चित्रित गर्दै मतदातामा नयाँ विकल्पको आवश्यकता रहेको सन्देश प्रवाह गरिरहेको छ।
विशेषगरी युवापुस्तालाई लक्षित गर्दै पारदर्शिता, सुशासन र जवाफदेहिता जस्ता मुद्दालाई केन्द्रमा राख्दै पार्टीले अघिल्लो निर्वाचनमा प्राप्त जनसमर्थनलाई जोगाइराख्ने प्रयास गरिरहेको छ। सामाजिक सञ्जाल र प्रत्यक्ष भेटघाट कार्यक्रममार्फत मतदातासँग जोडिन खोज्नु यस पार्टीको प्रमुख रणनीतिका रूपमा देखिएको छ।
यसबीच अन्य नयाँ दल तथा स्वतन्त्र उम्मेदवारहरू पनि विकासमुखी एजेण्डा प्रस्तुत गर्दै चुनावी मैदानमा उत्रिएका छन्। उनीहरूले परम्परागत राजनीतिक प्रतिस्पर्धाबाट अलग रहेर स्थानीय आवश्यकतामा आधारित विकास, रोजगार सिर्जना, शिक्षा र स्वास्थ्य सुधार जस्ता विषयलाई प्रमुख मुद्दाका रूपमा उठाइरहेका छन्। ‘देश बनाउने नयाँ सोच’ भन्ने सन्देशसहित उनीहरूले मतदातामा आशा जगाउने प्रयास गरिरहेका छन्।
यसपटकको निर्वाचन केवल दलबीचको प्रतिस्पर्धा मात्र नभई मतदाताको विश्वास जित्ने मनोवैज्ञानिक प्रतिस्पर्धा पनि हो। पुराना भनि चर्चामा रहेका दलहरू आफ्नो विरासत जोगाउने चुनौतीमा छन् भने नयाँ दलहरू विश्वास र सम्भावनाको राजनीतिलाई संस्थागत गर्ने अवसर खोजिरहेका छन्।
निर्वाचन नजिकिँदै जाँदा मतदाताको प्राथमिकता, राजनीतिक दलहरूको विश्वसनीयता र विकासका ठोस एजेण्डाले अन्तिम परिणाम निर्धारण गर्ने देखिन्छ। यसपटकको चुनावले नेपालको राजनीतिक यात्रामा नयाँ सन्तुलन सिर्जना गर्ने अपेक्षा गरिएको छ।
केहि वाैद्धिक जमातले जेनजी आन्दोलनसँग जाेड्दै साे आन्दोलनको अैाचित्यकाे सफलता र आसफलतालाई समेत याे निर्वाचन जाेडिएकाे बताएका छन्।
आसन्न चुनावपछि केहि पुराना नेताहरुकाे प्रतिस्पर्धाकाे चुनावी यात्रा सकिने छ भने राजनीतिक रँगमञ्चमा थप युवाले प्रवेश पाउनेछन्।
