२०८३ साउन २४, आइतबार

श्रीखबर/चितवन । साहित्य सिर्जना, प्रकाशन र साहित्यकारको सम्मानलाई निरन्तर प्राथमिकता दिँदै आएको पल्लव साहित्य प्रतिष्ठान, नारायणगढ, चितवनले आफ्नो नियमित कार्यक्रमलाई विशेष साहित्यिक उत्सवका रूपमा आयोजना गर्ने भएको छ।

प्रतिष्ठानले २०८३ भदौ १३ गते बिहान ११ बजे कमलनगरस्थित पर्व पार्टी प्यालेस, चितवनमा आयोजना गर्न लागेको कार्यक्रममा स्रष्टा सम्मान तथा पुरस्कार समर्पण, ‘पल्लव’ पत्रिकासहित विभिन्न पाँच कृतिको विमोचन तथा अतिथि काव्य गोष्ठी आयोजना गरिने भएको छ।

साहित्यकार तथा सर्जकहरूलाई सिर्जनाका माध्यमबाट समाज, संस्कृति र मानवीय संवेदनासँग जोड्ने उद्देश्यसहित सक्रिय रहँदै आएको प्रतिष्ठानले आफ्ना नियमित कार्यक्रममार्फत मार्फत नेपालका विभिन्न भूगोलसँगै विदेशमा रहेका नेपाली साहित्यकारलाई समेत विभिन्न साहित्यिक विधामा सम्मान तथा पुरस्कार प्रदान गर्दै आएको प्रतिष्ठानका अध्यक्ष ऋषिप्रसाद लामिछाने`गाेर्खे साईँलाे´ जनाकारी दिनुभयाे ।

** कृति प्रकाशनदेखि स्रष्टा सम्मानसम्म

पल्लव साहित्य प्रतिष्ठान केवल साहित्यिक कार्यक्रम आयोजना गर्ने संस्थाका रूपमा मात्र नभई स्रष्टाका सिर्जनालाई पुस्तकका रूपमा पाठकमाझ पुर्‍याउने, साहित्यिक प्रतिभाको सम्मान गर्ने र साहित्यिक विमर्शलाई निरन्तरता दिने अभियानमा सक्रिय संस्थाका रूपमा स्थापित हुँदै गएको छ।

प्रतिष्ठानको वार्षिक कार्यक्रममा विभिन्न साहित्यकारका सिर्जनालाई समेटिएका कृतिहरू सार्वजनिक गरिनुका साथै स्रष्टाहरूलाई सम्मान तथा पुरस्कार समर्पण गरिने भएकाले कार्यक्रमलाई साहित्यिक क्षेत्रमा अर्थपूर्ण भेटघाट र सिर्जनात्मक उत्सवका रूपमा हेरिएको छ। यसै अवसरमा ‘पल्लव’ साहित्यिक पत्रिकासहित पाँचवटा कृति विमोचन हुने प्रतिष्ठानले जनाएको छ। कृति विमोचनसँगै आयोजित अतिथि काव्य गोष्ठीले कार्यक्रमलाई थप साहित्यिक र सिर्जनात्मक बनाउने अपेक्षा गरिएको छ

** साहित्यकारको उपस्थितिले कार्यक्रम थप विशेष बन्ने

देशका विभिन्न स्थानबाट साहित्यकार तथा स्रष्टाहरूको सहभागिता रहने अपेक्षा गरिएको कार्यक्रममा चितवनबाहिरबाट आउने अतिथिहरूका लागि भदौ १२ गते नै चितवन आइपुग्ने अतिथिहरूलाई निःशुल्क खान–बस्नको व्यवस्था गरिएको अध्यक्ष लामिछानेले बताउनुभयो ।

अध्यक्ष लामिछानेका अनुसार साहित्यकारको सम्मान, कृतिको प्रकाशन र सिर्जनात्मक संवादलाई एउटै थलोमा जोड्ने उद्देश्यले नियमित अन्तर्गत कै याे कार्यक्रम हुनलागिरहेकाे हाे।

“स्रष्टाको सम्मान र सिर्जनाको संरक्षण नै साहित्यिक संस्थाको महत्वपूर्ण दायित्व हो” भन्ने मान्यताका साथ पल्लव साहित्य प्रतिष्ठानले साहित्यिक गतिविधिलाई निरन्तरता दिँदै आएको छ। साहित्यलाई केवल पुस्तक र कविताभित्र सीमित नराखी स्रष्टा, सिर्जना र पाठकबीचको सम्बन्धलाई अझ मजबुत बनाउने अभियानका रूपमा प्रतिष्ठानका गतिविधि अघि बढिरहेकाे जनाइएको छ। यही अभियानको निरन्तरताका रूपमा आयोजना हुन लागेको भदौ १३ गतेको कार्यक्रमले चितवनको साहित्यिक वातावरणलाई थप उत्साहित बनाउने विश्वास प्रतिष्ठानले लिएको छ।

@ कार्यक्रमका मुख्य आकर्षण

#स्रष्टा सम्मान तथा पुरस्कार समर्पण

# ‘पल्लव’ पत्रिकासहित पाँच कृतिको विमोचन

# अतिथि काव्य गोष्ठी

# देश–विदेशका साहित्यकार तथा स्रष्टाको सहभागिता

# साहित्यिक विमर्श तथा सिर्जनात्मक भेटघाट

स्थान : पर्व पार्टी प्यालेस, कमलनगर, चितवन

मिति : २०८३ भदौ १३ गते समय : बिहान ११ बजे