२०८३ असार ३२,बिहीबार
ज्ञानेन्द्र पाेख्रेल, पश्चिम नेपाल
बर्दिया । बढैयाताल गाउँपालिकाले कृषिमा आधुनिकीकरण र उत्पादन वृद्धि गर्ने उद्देश्यले २६२ जना किसानलाई ५० प्रतिशत अनुदानमा कृषि तथा पशुपक्षीजन्य यन्त्र–उपकरण वितरण गरेको छ।
गाउँपालिकाको कृषि विकास शाखाद्वारा आयोजित कार्यक्रमअन्तर्गत करिब २६ लाख रुपैयाँ बराबरका कृषि सामग्री किसानलाई हस्तान्तरण गरिएको कृषि शाखा प्रमुख दिपेन्द्र श्रीवास्तवले जानकारी दिए। उनका अनुसार यस वर्ष गाउँपालिकाले कृषि क्षेत्रका लागि विनियोजित बजेटबाट किसानको मागका आधारमा सामग्री उपलब्ध गराएको हो।
वितरण गरिएका सामग्रीमा ३९ वटा पानी तान्ने मोटर, ९१५ केजी डेलिभरी पाइप, ७२ वटा स्प्रे ट्याङ्की, ४ वटा मकै रोप्ने मेसिन, २१ वटा टनेल प्लास्टिक, १२ वटा मल्चिङ प्लास्टिक, ५ वटा ग्रिननेट, २१ वटा घाँस काट्ने मेसिन, ८१ वटा काउम्याट, १२ वटा मिल्क क्यान र १० वटा ठेलागाडा रहेका छन्।
गाउँपालिका उपाध्यक्ष लक्ष्मीकुमारी अधिकारीको अध्यक्षतामा सम्पन्न कार्यक्रममा गाउँपालिका अध्यक्ष हिमालय त्रिपाठीले कृषि यन्त्रीकरण र आधुनिक प्रविधिको प्रयोग विस्तार गर्दै उत्पादन र किसानको आम्दानी बढाउन आगामी वर्षहरूमा पनि यस्ता कार्यक्रमलाई निरन्तरता दिइने बताए।
उपाध्यक्ष अधिकारीले कृषि उत्पादन वृद्धि, आयात प्रतिस्थापन, निर्यात प्रवर्द्धन तथा किसानको जीवनस्तर उकास्न गाउँपालिका प्रतिबद्ध रहेको उल्लेख गरिन्।
