२०८३ असार २५, बिहीबार
ज्ञानेन्द्र पाेख्रेल, पश्चिम नेपाल
श्रीखबर/बर्दिया प्रहरीले १२ ग्राम ६३० मिलिग्राम ब्राउन सुगरसहित सुर्खेतका एक युवालाई पक्राउ गरेको छ। पक्राउ पर्नेमा सुर्खेत जिल्ला गुरुबाकोट नगरपालिका–१४ निवासी २४ वर्षीय वीरेन्द्र परियार रहेका छन्।
जिल्ला प्रहरी कार्यालय बर्दियाका अनुसार असार २४ गते साँझ करिब ५ बजे बढैयाताल गाउँपालिका–८ नयाँबस्ती क्षेत्रमा भारतको बलैगाउँबाट नेपालतर्फ पैदल आउँदै गरेका परियारलाई शंकास्पद अवस्थामा हिँडिरहेको देखेपछि प्रहरीले जाँच गरेको थियो। शरीर तथा साथमा रहेको सामान खानतलासी गर्दा शुद्ध तौल १२ ग्राम ६३० मिलिग्राम ब्राउन सुगर बरामद भएको प्रहरीले जनाएको छ।
प्रहरीले परियारको साथबाट दुई थान स्क्रिनटच मोबाइल फोन समेत बरामद गरेको छ। हाल पक्राउ परेका परियारलाई इलाका प्रहरी कार्यालय मैनापोखरको हिरासतमा राखी लागूऔषध सम्बन्धी कसुरमा थप अनुसन्धान भइरहेको जिल्ला प्रहरी कार्यालय बर्दियाले जनाएको छ।
