२०८३ असार २२, साेमबार
श्रीखबर,काठमाडौं । भूमि व्यवस्था, सहकारी तथा गरिबी निवारण मन्त्रालयअन्तर्गतको मालपोत तथा नापी कार्यालयले सरकारी स्वामित्वको जग्गामा अनुमति बिना निर्माण गरिएका भवन तथा अन्य संरचना तीन दिनभित्र हटाउन सम्बन्धित पक्षलाई सार्वजनिक सूचना जारी गरेको छ।
कार्यालयले नेपाल सरकारको स्वामित्वमा रहेका जग्गा राष्ट्रियस्तरका निजामती कर्मचारी ट्रेड युनियन तथा विभिन्न कर्मचारी संगठनहरूले भोगचलन गर्दै अनुमति बिना भवन तथा अन्य संरचना निर्माण गरेको पाइएको जनाएको छ। ती संरचनाले सरकारी जग्गाको अस्तित्वमा असर पुर्याएको भन्दै तत्काल हटाउन निर्देशन दिइएको हो। सार्वजनिक सूचनाअनुसार सूचना प्रकाशित भएको मितिले तीन दिनभित्र सम्बन्धित संघ–संगठनले आफ्नै खर्चमा भवन तथा संरचना हटाई जग्गा खाली गरी कार्यालयलाई जानकारी गराउनुपर्नेछ।
तोकिएको अवधिभित्र अटेर गरे प्रचलित कानुनबमोजिम संरचना हटाइने र त्यसबाट हुने सम्पूर्ण खर्च सम्बन्धित पक्षबाट असुल गरिने चेतावनीसमेत दिइएको छ।
सूचनामा स्वतन्त्र राष्ट्रसेवक कर्मचारी संगठन, नेपाल मधेशी निजामती कर्मचारी मञ्च, नेपाल निजामती कर्मचारी संगठन, नेपाल निजामती कर्मचारी युनियन, नेपाल राष्ट्रिय निजामती कर्मचारी संगठन, एकीकृत सरकारी कर्मचारी संगठन नेपाल, नेपाल स्वास्थ्यकर्मी संघ तथा मधेशी स्वास्थ्यकर्मी फोरम नेपाललगायतका संगठनहरूको नाम उल्लेख गरिएको छ।
