२०८३ जेष्ठ ११, साेमबार
श्रीखबर/चितवन । चितवन उद्योग वाणिज्य संघले नवआगन्तुक जिल्ला प्रहरी प्रमुख रामेश्वर पौडेललाई स्वागत गर्दै जिल्लाको शान्ति–सुरक्षा, व्यवसायिक वातावरण र निजी क्षेत्रसँगको सहकार्यबारे महत्वपूर्ण छलफल गरेको छ।
संघको सचिवालयमा शनिबार आयोजित कार्यक्रममा चितवन जिल्लाका लागि सरुवा भै आउनुभएका प्रहरी उपरीक्षक पौडेललाई औपचारिक स्वागत गरिएको हो।
कार्यक्रममा बोल्दै संघका अध्यक्ष चिरञ्जीवी सुवेदी ले उद्यमी–व्यवसायी र प्रहरी प्रशासनबीच विगतदेखि नै सहकार्य हुँदै आएको उल्लेख गर्दै चितवनको आर्थिक तथा व्यवसायिक विकासका लागि बलियो सुरक्षा व्यवस्था अपरिहार्य रहेको बताउनुभयो। वहाँले जिल्ला प्रहरी कार्यालयले सञ्चालन गर्ने सकारात्मक अभियान तथा सुरक्षा व्यवस्थापनका काममा संघको पूर्ण सहयोग रहने प्रतिबद्धता व्यक्त गर्दै प्रहरी प्रमुख पौडेलको चितवन बसाइँ सफल हुने विश्वास व्यक्त गर्नुभयो।
कार्यक्रमका प्रमुख अतिथि प्रहरी उपरीक्षक रामेश्वर पौडेलले निजी क्षेत्र देशको आर्थिक मेरुदण्ड भएको उल्लेख गर्दै शान्ति सुरक्षा बिना आर्थिक समृद्धि सम्भव नरहेको बताउनुभयो। उहाँले चितवन जिल्लाको शान्ति, सुरक्षा र अमनचयन कायम गर्न कुनै कसर बाँकी नराख्ने प्रतिबद्धता जनाउँदै सुरक्षा व्यवस्थापनमा उद्योगी–व्यवसायीहरूको सहकार्य आवश्यक रहेको धारणा राख्नुभयो।
त्यस्तै, निवर्तमान अध्यक्ष सुमनकुमार श्रेष्ठले प्रहरी प्रशासन मात्रले समाजलाई पूर्ण सुरक्षित बनाउन नसक्ने भन्दै व्यवसायीहरू स्वयं पनि सुरक्षा सचेतनामा सक्रिय हुनुपर्ने बताउनुभयो। उहाँले व्यवसायिक प्रतिष्ठानमा सिसी क्यामेरा पसलभित्र मात्र नभई बाहिरी सडक क्षेत्रमा समेत जडान गर्न आग्रह गर्दै जिल्लाको शान्ति सुरक्षाका सवालमा संघ प्रहरीसँग हातेमालो गरेर अघि बढ्ने स्पष्ट पार्नुभयो।
कार्यक्रममा संघका उपाध्यक्षहरू नारायण प्रधान, जनक पौडेल, राजन पिया, कार्यकारी निर्देशक निलबहादुर केसी लगायत कार्यसमिति सदस्य, विभिन्न वस्तुगत संघका अध्यक्ष तथा पदाधिकारीहरूको उपस्थिति रहेको थियो।
