२०८२ मङ्सिर २९,साेमबार
श्रीखबर/ चितवनको कालिका नगरपालिकामा रिङरोडको महत्वपूर्ण खण्ड मानिने गैरीबारी, चापागौंडी हुँदै शेरबास जाने कालोपत्रे सडक तथा पक्की नाला निर्माण कार्यको शिलान्यास गरिएको छ।
कालिका नगरपालिका वडा नं. ८ गैरीबारीमा आयोजित कार्यक्रममा नगर प्रमुख विनोद रेग्मीले शिलान्यास गर्नुभएकाे हाे। आयोजनाअन्तर्गत १ हजार ६ सय ५० मिटर कालोपत्रे सडक र २ हजार ६ सय ५० मिटर पक्की नाला निर्माण गरिनेछ।
नगर प्रमुख रेग्मीले विकास निर्माण कार्यमा सबै पक्षको सहकार्य आवश्यक रहेको बताउँदै यो सडकले वैकल्पिक मार्गको विकास, पर्यापर्यटन प्रवर्द्धन, कृषि उपजको सहज ढुवानी तथा सडक जनघनत्व न्यूनीकरणमा महत्वपूर्ण योगदान दिने बताए।
साथै, यो सडकले कालिका नगरपालिकाको आर्थिक विकासमा रणनीतिक टेवा पुर्याउने मेयर रेग्मीको भनाइ थियो। “आगामी आर्थिक वर्षमा कालिकाको शेरबाससम्मै पुग्ने गरी यो सडक जोड्ने लक्ष्य लिएका छौं,” नगर प्रमुख रेग्मीले जानकारी दिनुभयो ।
सडक तथा नाला निर्माण सम्पन्न भएपछि स्थानीय बासिन्दाको दैनिकी सहज हुने अपेक्षा व्यक्त गर्दै उनले नगरका अन्य क्षेत्रका अधुरा बाटाघाटो पनि क्रमशः विस्तार गरिँदै जाने बताउनुभयाे।
नगरपालिकाका भौतिक पूर्वाधार शाखा प्रमुख इन्जिनियर किशोर खतिवडाका अनुसार सो आयोजनाका लागि नगरपालिकाबाट रु १ करोड ८० लाख र बागमती प्रदेश सरकारबाट रु १ करोड २० लाख गरी कुल ३ करोड रुपैयाँ बजेट विनियोजन गरिएको हो। यद्यपि, जी.ए. राम माता कंकालिनी जेभी, चितवनसँग रु २ करोड ३ लाख ९० हजार रुपैयाँमा ठेक्का सम्झौता भएको उनले जानकारी दिनुभयाे।
इन्जिनियर खतिवडाका अनुसार २०८२ मंसिर २५ गते ठेक्का सम्झौता भई २०८३ साल जेठ ३१ गतेभित्र निर्माण कार्य सम्पन्न गर्ने लक्ष्य राखिएको छ। यसअघि नै नगरपालिकाले कालिका–८ गैरीबारी झरना जाने बाटोलाई पक्की सडकका रूपमा विकास गरिसकेको छ।
शिलान्यास कार्यक्रममा प्रमुख प्रशासकीय अधिकृत देवराज चौलागाईं, नगर प्रवक्ता लक्ष्मण पौडेल, वडा नं. ८ का वडा अध्यक्ष चित्रबहादुर मगर, वडा सदस्यहरू तथा स्थानीय बासिन्दाको उल्लेख्य सहभागिता रहेको थियो।
