२०८१ असाेज १२, शनिबार
चितवन ।मुग्लिन – नारायणगढकाे नाै किलाे भन्ने स्थानमा सडक २ फिट तल भासिँदा सडक पूर्ण अवरुद्घ भएकाे छ ।
सडक भासिएको ठाउँमा जुगेडीबाट मुग्लिनतर्फ जाँदै गरेको प्र३–०१–०२४ च ३०५६ नम्बरको बलेरो जिप फसेको छ ।
इच्छाकामना–३ मौवाखोला, पानीधारा र दतिखोलामा पनि पहिरो खसेर सडक अवरुद्ध भएको छ ।पृथ्वी राजमार्गमा पर्ने इच्छाकामना गाउँपालिका–४ घोप्टेभिरमा खसेको पहिरो दुई वटा स्काभेटरले पन्छाउन थालेको चितवनका प्रमुख जिल्ला अधिकारी इन्द्रदेव यादवले जानकारी दिए ।
त्यस्तै, देवघाट स्थितमा रहेको जय भोले कुटी (थारु कुटी) र अखण्ड धर्मशाला डुबानमा परेका छन् । कुटी र धर्मशालामा बस्ने १०० जनालाई उद्धार गरी मारवाडी समाजको भवनमा राखिएको छ ।
भरतपुर–२५ सखुवानी बस्ने राजेन्द्र महतोले सञ्चालन गरेको शिव फर्निचरमा बेथरी खोलाको बाढी पसेको प्रजिअ यादवले बताए । बाढीले काठ, मुढा लगायतका फर्निचर बगाएको छ भने मानवीय क्षति नभएको उनले बताए । प्रहरी र स्थानीयहरु उद्धारमा जुटेका छन् ।
