गोरखा मिडिया नेटवर्कमा देशभरिका ९ वटा सहकारीको रकम अपचलन भएको समितिको निष्कर्ष
२०८१ भाद्र ३१, साेमबार
सहकारीसम्बन्धी संसदको विशेष समितिले गोरखा मिडियाका तत्कालीन प्रबन्ध निर्देशक रवि लामिछानेसहित चार जनालाई कारबाही सिफारिस गरेको छ। यो निर्णय गोरखा नेटवर्क प्रा.लि.को खातामा आएको रकम र यसको खर्च प्रक्रियामा अनियमितता भेटिएपछि गरिएको हो।
समितिले लामिछानेसहित अन्य तीन जनालाई पनि यो अनियमिततामा संलग्न भएको भन्दै कारबाहीका लागि सिफारिस गरेको छ। अनुसन्धानमा गोरखा नेटवर्क प्रा.लि.को आर्थिक कारोबारमा पारदर्शिताको कमी देखिएको छ, जसमा रवि लामिछानेको पनि प्रत्यक्ष संलग्नता पाइएको छ। सोही कारण समितिले लामिछाने र अन्य तीनजनालाई कारबाहीका लागि सिफारिस गरेको हो। यो घटनाले सञ्चार क्षेत्रसँगै सहकारी क्षेत्रमा आर्थिक पारदर्शिता र जवाफदेहिताबारे थप बहसको आवश्यकता रहेको देखाएको छ।
गोरखा मिडिया नेटवर्कमा देशभरिका ९ वटा सहकारीको रकम अपचलन भएको समितिको निष्कर्ष छ। प्रतिवेदनमा उल्लेख भएअनुसार गोरखा मिडिया नेटवर्कमा पोखराको सूर्यदर्शन, बुटवलको सुप्रिम, काठमाडौंको स्वर्णलक्ष्मी, चितवनको सहारा, वीरगन्जको सानोपाइलाको रकम अपचलन भएको छ। त्यस्तै इमेज, समानता, सुमेरू र आइएमईबाट पनि गोरखा मिडियामा रकम अपचलन भएको प्रतिवेदनमा उल्लेख छ। ती सहकारीका सञ्चालक र निर्णय प्रक्रियामा संलग्न सबैलाई कानुन विपरीतको कार्य गरेकाले कारबाहीका लागि सम्बन्धित निकायमा पठाउन समितिले सरकारलाई सिफारिस गरेको छ।
समितिले फरार रहेका गितेन्द्रबाबु भनिएका जीबी राई र थानबहादुर बुढा मगर, दिनेश रोक्का, सागर केसी, तस्वीरण खातुन, भुपेन्द्र राईलाई तत्काल पक्राउ गर्न सरकारलाई निर्देशन समेत दिएको छ।
